首先多謝你哋關心, 請原諒我唔一一回喇.
係, 自從我媽媽過咗身之後, 我嘅健康陸續出現咗一d問題, 有d比較差. 不過唔係乜嘢開心事, 唔講喇.
貓仔依家基本上冇乜問題, 已經捉過雀仔, 尋日重捉隻老鼠返屋企添. :)
本嚟11月20日係佢嚟咗我哋屋企一周年, 我諗住影d相上嚟, 但最後都係因為唔舒服又冇上. 我成日都話今晚開電腦, 但每晚食完晚飯已經覺得好攰.
貓仔之前都有幾大麻煩.
話說佢受傷嘅係左脚, 文話佢右腿都有瘀傷(我當時唔敢睇, 唔知係咩樣), 去拆線之後, 我見佢右邊大髀d黑色點解咁耐都唔退嘅呢? 我就同文講, 佢一睇, 話唔係喎, 先頭醫生話佢有瘀傷嗰陣係內側嘅喎, 唔係出面嘅喎, 會唔會有問題架? 咁就打電話俾醫生, 醫生話冇理由係瘀, d瘀咁耐應該一早自己散晒, 叫我哋帶番佢返去睇.
醫生檢查咗佢之後, 見佢個頭有一粒眉豆咁大嘅地方有咗毛(我重以為係佢受傷嘅時候唔知俾咩勾到), 懷疑佢受真菌侵襲. 醫生話其實任何動物本身都有好多真菌, 平時冇事, 但Healthy又受傷又動手術, 抵抗力一定受影響, 咁d真菌就會襲擊佢.
醫生一邊用藥一邊攞d毛去種菌. 兩個星期之後確定係真菌, 但喺菌譜搵唔到明顯相同嘅菌類, 所以要等夠三個禮拜.
呢段時間真係好辛苦, 每日得四五個鐘瞓, 對我自己都好有影響, 但又冇辦法. 都重好彩我英明呀, 換洗衣機嗰陣, 文話叫人幫手掉埋部舊嘅, 我話唔掉, 擺喺外面洗衣棚, 幫d貓洗毛巾呀'床舖'呀咁, 咁就幫咗我好多啦, 以前佢哋d嘢我用手洗架.
隻貓嗰時未完全康復, 胃口又差, 情緒又未穩定, 小小嘢都驚. 佢要食好幾種藥, 除咗對抗真菌, 重要各種增強抵抗力嘅輔助藥物, 營養素之類, 又要消毒, 搽藥膏, 一日兩次, 每次起碼個半鐘先做得完, 淨係呢d每日都唔見咗三四個鐘. 頭尾三個月, 每個星期見一次醫生, 試過有一次嘔, 又送番佢去留醫觀察. 好彩醫生姑娘個個都好中意佢, 對佢好好, 返咗屋企都會打電話嚟問佢點. 呢隻貓仔性格好單純, 真係幾可愛嘅.
依家佢已經停咗藥, 醫生話如果冇乜唔妥就唔使再睇. 不過佢雖然已經生番d毛, 但曾經嚴重受影響嘅皮膚, 連生番出嚟嘅毛都係黑色嘅, 都唔知會唔會變番正常. 冇所謂啦.
喺花盆度晒太陽
當時d真菌擴散得好快, 由最初右腿好快傳染到左邊都有.
可以爬樹
見到明顯變黑咗嘅毛
手術剃光嘅毛已經生番好長, 但d黑色唔褪.
捉到隻雀仔
大個貓好多喇
呢d大大小小嘅針筒係餵藥嘅
以前小公主餵奶都係用差不多嘅針筒, 不過healthy嚟嘅時候已經識食嘢.
點樣唔見咗貓仔嘅故事要下次先寫到, 因為好攰喇. :)
人貓無恙,慰甚.
回覆刪除末日後第四日重逢,恍若隔世.
今天聖誕大樂.
---白田
HELLO, MRS MAN,
回覆刪除健康要緊.
貓仔大大下都幾唔同, 而家個樣幾大貓, 有D惡樣, 唔係果D 隨便敢去掂佢果D樣. 今日過節我地食EISMAN, K 媽媽在醫院, 佢之前唔舒服, 醫院要幫佢CHECK 原因, 就留住0係醫院. EISMAN 果樣野係火雞捲, 一大捲, 去骨包D野入去果D, 一焗食得, 出奇地幾好食.
祝身體健康.人貓都健康.
白田先生& sam,
回覆刪除多謝晒你哋.
係呀, 一話良性, 心理威脅即刻減咗一大半. 不過實際上仍然係會有影響同埋不適, 令你冇得當唔存在.
貓仔大個咗好多, 但一d都唔惡, 一年有多, 依然好怕lucky. 而且佢乖好多, 唔會好似lucky咁等冇人就做壞事, 又成日喺屋企小便.
k媽媽出咗院未? 希望佢冇事. 人到咗咁上下年紀, 小心d冇壞.
今個聖誕我邊度都冇去, 淨係上個星期五去奶奶屋企, 之後文約朋友都係佢自己出去.
講起嗰日去奶奶度又係好笑. 夜晚返到嚟已經好攰, 即刻去沖涼諗住瞓覺, 點知一入休息區就見到貓仔喺個鞋櫃前面唔知喺度搵乜, 我以為係昆蟲之類嘢都唔定啦, 又睇嚟睇去都冇嘢.
咁我就叫佢跟我去厨房, 喺雪櫃攞塊火腿俾佢食. 佢好中意食火腿架嘛, 但佢唔食, 即刻又走番去個鞋櫃度.
點解呢? 諗起早幾日我着紅色嗰對拖鞋boot嗰陣佢好有興趣, 可能羊皮d味重喺度, 佢係咁咬d毛毛. 咁我就打開個鞋櫃, 等佢睇下係咪裡面d鞋味佢以為係有動物啦. 但唔係喎, 佢唔係對d鞋有興趣喎, 佢走入個櫃度猛咁抓個背板, 咁即是有問題喎.
唉, 惟有幫佢去搬開個鞋櫃. 點知原嚟有隻老鼠仔喺後面呀! 咁梗係俾佢捉番啦.
可能我哋唔喺屋企嗰陣佢捉隻老鼠仔返嚟走甩咗, 隻老鼠仔走咗去個櫃後面佢又冇辦法.
搞一大餐, 終於又要點幾鐘先有得瞓.