蔓陀蘿花開

尋晚入更衣房, 嘩, 好香呀! 唔係玫瑰. 頭先去後面睇下, 果然, 玫瑰已經謝喇, 係對住個窗口仔嗰棵大花蔓陀蘿開咗花, 雖然重係好少.講起呢棵蔓陀蘿, 係好多年前種嘅, 跟住我發覺佢太霸道, 所以起咗佢出嚟唔要. 點知過咗兩年, 佢又生番出嚟, 可能係d根起唔乾淨, 佢喺根度又爆出嚟.

本嚟蔓陀蘿花開我實知, 因為客廳同飯廳嘅玻璃門前面各有一棵, 日日見到, 但早兩個月文叫人鋸咗去, 而呢排成日落雨我又冇行去屋後, 所以唔知佢開花. 都好, 有d驚喜.