暴風的威力

埋葬咗Lucky嗰晚瞓得好差, 醒咗四次. 第二晚覺得唔舒服, 到四點鐘出咗身汗, 起身沖涼. 四點九諗住上番床, 個天就落起大雨. 矇矓中聽見好似好大風, 跟住冇咗電. 

起床之後一睇, 隔離太太後園嗰棵大松樹竟然吹斷咗! 大風到好恐怖. 我同healthy兩個喺厨房後面嘅玻璃屋望出面, d風一秒都唔停, 有時發出d怪聲, healthy嚇到走.

冇電, 冇電話, 夜晚食飯嘅時候要點蠟燭. 我同文講, 冇電都好過冇水, 我哋好彩有水. 文話, 如果持續冇電, 水都好快冇. 我當時唔係咁在意. 點知第二日果然連水都冇埋.

我哋好彩有一個100公升嘅不鏽鋼儲水箱. 不過100公升唔用得好耐, 好彩唔停咁落雨, 可以用雨水沖厠所. 

電話突然中斷, 冇得通知香港, 我大佬打鑼咁搵我, 我侄女喺文嘅facebook問我哋究竟發生咩事. 又係好彩, 第五日, 文嘅電話最早恢復服務, 即刻話俾佢聽我哋冇事, 之後我侄女約時間打電話俾我, 證實虛驚一場.

天氣好轉之後落去松園睇下, 原嚟我哋都有二三十棵松樹吹倒或者吹斷, 有d連根拔起. 我落去水源嘅私家路都俾d松樹攔斷, 好彩依家雨季, 唔需要落去. 松林嗰邊重未去睇, 唔知有幾多樹倒咗. 依家要等人嚟搬樹清理, 有排都未正常. 我自己屋企後院都重有花花草草要收拾. 以前我哋搞亂咗d嘢, 媽咪會話好似打過風咁, 哈, 打過風係真嘅好亂龍架原嚟.