十年苦等, 興奮期待

唔知你有冇覺得奇異果嘅毛好煩, 就咁洗唔係咁容易可以洗甩, 然後好容易就會污染果肉.

所以我曾經諗, 奇異果冇毛就好嘞. 

果然有喎.

大約十一十二年前, 見到冇毛嘅奇異果(見過一次之後再冇遇上過). 

咩味嘅呢? 買幾個試下先. 味道冇乜特別, 但冇毛就吸引. 

於是我留咗核做種子, 又發芽成功.

多年嚟我一直小心保護耐心等待, 終於依家有一棵有花蕾. 我比劉文正幸運呀, 哈哈!

好開心, 好雀躍.

依家好想見到佢開花, 睇下係雌花定係雄花.

由於第二個品種嘅經驗, 我覺得雄花對品種嘅影響似乎唔係咁大, 所以我希望係雌花.

到開花之後, 又會好期待結果, 證實究竟父系特點嘅遺傳性強d呢, 定母系特點嘅遺傳性強d.

啊, 種嘢就係咁, 祇要種, 就有期待.

祇要種, 就有希望.

不過, 好多, ---可以講大多數,--- 嘅果樹都需要用嫁接去保持品種嘅優良特性, 實生苗係有變數嘅.

無論如何, 超過十年嘅期待終於要揭盅, 任何結果都係令人興奮. 

(部相機唔知黐咗邊條線, 最近有時會影到d直紋出嚟)

唔知係咪初花, d花蕾大得好慢. 本嚟佢係所有品種中萌動最早, 但其他嘅一發芽, 佢就明顯已經跑輸咗.

舊有品種, 大得好快.

失之東隅, 得之桑榆?

桃樹壽命短, 所以生長快, 今年嫁接, 出年就有機會大量結果; 
而橙樹算係長壽嘅樹種, 所以生長好慢. 呢棵橙樹經我嫁接已經四年幾, 第二年結果, 但都係得幾個咁多. 不過亦因為結果少, 所以d橙幾大個. 

我嫁接嘅橙樹結果

右手手腕痛咗幾日都唔好, 唔想打字喇, 睇下呢棵橙樹啦. 右邊係原樹結果, 左邊係我嫁接.

奇異果兩個品種

奇異果依家先猛咁落葉, 冇咗葉嘅保護, d果實好快會被霜雪爛, 所以尋日去摘咗佢. 不過冇人幫手扶梯, 高嘅唔敢摘, 暫時摘得幾多就幾多.
有一個品種係新買返嚟, 第一年結果, 得三個, 摘晒. 


文唔夠一個月內兩次感冒, 燒到三十九度幾, 如果喺香港就有排驚. 奇異果有大量維他命C, 啱食啦.

 

單頭果永遠都係比多頭嘅大架啦

唔知係咪佢有特別嘅受粉傾向, 咁多年嚟結嘅果都有好多打橫生咁嘅樣, 好似兩個連埋一齊

右邊三個係新買嗰個品種, 較圓身

舊有嗰個品種多毛好多

批皮嘅時候手感係兩個都硬身, 好似唔多熟. 新品種好似疏鬆d. 顏色一個偏綠, 一個偏黃

食起上嚟完全係另一種感覺, 舊有品種焾甜, 新品種酸, 硬, 纖維好粗. 唔知係咪遲熟品種. 第一年結果, 而且樣本太少, 唔作得準.

重唔落葉嘅?

真係唔知點解釋, 每朝遍野白茫茫一地霜, 照計番石榴應該一早落晒葉, 但今年唔知黐咗邊條線, 除咗最嫩嘅頂葉軟軟地之外, 其他嘅到依家都好地地.

 

惟一嘅果實, 大約得六. 七 cm 大, 食唔食得呢?

蘋果梨應該玩完

用蘋果嚟嫁接嗰棵梨, 最後跌剩一個梨果, 但總算捱得到成熟. 不過連新葉都欠奉, 而且好早就枯落, 相信出年存活嘅機會都唔大囉.

個梨果我有試過, 味道係梨味, 但比較淡, 而且少咗啤梨嘅幼滑, 口感有d '鞋' . 可能係生長唔正常(當然啦, 四五年都係得嗰一呎咁上下長, 完全冇分枝, 邊夠營養?), 個梨果比母樹嘅果體小得多.

得二百幾克重

切開係咁嘅

呢個係去棵母樹度摘嘅, 普通size. 呢d冬梨大嘅可以去到成公斤一個, 比較硬, 通常用嚟烹煮後先食, 例如做果醬呀, 甜品呀咁.

 喺嫁接嘅嗰棵蘋果樹本身依然好多葉嘅時候, 棵梨已經冇晒葉

軟木樹 --- 橡

 原嚟橡樹子甩咗頂帽仔就表示成熟, 可以採收

我覺得佢哋好容易發芽, 所以周圍都可以見到佢d樹苗仔

左邊係生嘅,右邊就係我頭先放入焗爐嗰幾粒

 

搣開佢係咁嘅樣. 我食過, 冇乜特別好食, 但絕對唔難食

 

尋日見成地都係d橡樹嘅果實, 咪執d返嚟囉. 
我問文食唔食得, 佢話苦嘅唔食得, 甜嘅就食得. 
點食架? 佢話好似栗子咁, 可以生食嘅. 
我攞個合桃鉗嚟剝, 原嚟佢d皮又薄又焾, 根本唔使鉗, 個鉗亦用唔上嘅. 
試下, 唔苦, 但亦唔甜. 咁即是點? 

頭先焗麵包, 突然諗起d橡子, 呀, 不如焗下佢睇下點啦.
洗咗幾粒, dum佢入個焗爐度.
啱啱沖好杯茶, bang bang 幾聲好大聲, 嚇到我成個跳起, 即時衝過去關咗個焗爐, 然後定眼一睇, 原嚟幾粒橡子高熱之下個殼爆開, 成粒咁彈起撞向焗爐壁. 
係咁咋吓? 驚魂甫定, 即刻係咁笑, 笑到差d透唔到氣.

今年惟一嘅pawpaw果

pawpaw跌剩一個果, 真係等得到果熟, 好彩呀!

好細個, 得96g. 當然, 第一年嘛. 希望出年正正經經, 正正常常咁結多d啦.

咩樣呢? 有d似芒果. 聞嘅味係似好熟嘅芒果. 食呢, 好甜, 香味太濃. 有冇人識鷹爪花? 係接近鷹爪花嘅香味(鷹爪子嘅香味好得多, 冇咁濃). 初步感覺油麻地, 可能唔會好多人接受. 如果香味淡d就好.

好多核, 切唔開

 佢係番荔枝一家, d核都似. 一個果仔有12粒核 :)

今年好食咗

Sam 從嚟都係好心腸嘅人辦, 而且溝通一流, 有問必答, 不吝賜教, 好多謝佢.

不過我冇嘢高, 我自己好心知肚明. 狹隘嘅興趣同愛好, 限制咗我嘅知識追求, 眼界好窄,  亦冇見識, 除咗有一顆真誠嘅心之外乏善可陳. 你哋講嘅嘢我基本上搭唔上嘴.  

不過聽下都好, 聽唔明都係要聽下, 有個概念, 有個印象, 有機會遇上相同話題嗰陣, 如果我重未失憶得晒, 就會諗起, 哦, 我識嘅高人有講過, haha! 呢d係我嘅虛榮(有得攀附), 亦都係實榮(有嘢學--學唔學得嚟係另一回事啦).

講到隱呢, 唔隱都唔得喇依家, 我媽媽走咗之後我嘅身體差得好快. 唔知幾時收到柯打, 我就收工架喇. 

況且咁多年限於我識嘅有限, 講嚟講去都係嗰三幅被, 係人都厭煩. 喺我嚟講, 有d係有我自己嘅看點, 因為我學緊嘢嘛, 要觀察,  對比. 但對冇呢個目的嘅人係冇意義.

以呢棵桔仔為例, 我喺度觀察緊. 

當初買嘅時候, 我話想要果實大嘅. 賣嘅人話, 嗱, 呢個啦, 大果嘅.

點知, 好多核, 亦多渣, 重超怕凍. 果肉係幾實, 幾爽, 但多核就好冇癮, 呢兩年根本冇心機去摘果. 不過因為佢d果皮好香, 唔捨得唔要, 就由得佢啦.

今年因為差不多所有果樹都冇果, 見佢到依家d果都重吊住喺度, 冇跌, 所以去摘嚟試下食唔食得. 吓? 諗唔到喎, 好甜, 好爽, 重少咗核. 點解呢? 因為氣候? 定因為棵樹老咗變好? 真係要睇多幾年囉. 點都好啦, 算係有個希望. :)

果皮上燶咗嗰d, 係俾冰雹打傷

錯過咗番石榴開花

棵番石榴買返嚟嘅時候打咗輸數, 預咗佢會凍死. 到依家為止都ok, 重開花結果添. 得一個咁多囉. 好過冇咁啦.

發現佢開花已經係花謝時候

依家有個番石榴仔

無花果

暑假係最忙碌嘅日子, 每日d法國親戚風車咁轉. 今年連香港都會有人嚟, 唔得閒上嚟架喇, 等我盡量貼多幾篇啦.

今夏嘅天氣真係唔識講, 睇下d無花果亂晒龍就知幾唔正常.


呢個品種係黑皮紅肉, 但依家個皮都未黑就已經熟咗

我五個品種佢最大

d果肉都未紅

 呢個本嚟七月初熟, 但因為六月太涼, 佢根本唔夠累積熱量, 所以遲遲唔熟. 但六月尾七月初突然熱到三十幾四十度, d太陽將佢表皮燒到燶, 但裡面係硬嘅, 連雀仔都食唔落

佢應該係綠皮粉紅肉, 呢d燒到變咗黃色嘅已經壞咗, 因為個皮燒死咗, 裡面唔會再熟

僅存嘅pawpaw

以為d pawpaw 已經跌晒, 原嚟有一個漏網. :) 第一次見到咁大個都未跌喎(touch wood), 哈哈! 有幾大? 我拮咗支大頭針喺塊葉度做比例. 一路都唔跌就好囉, 發下夢先. :)

呢棵橙樹都係用枳做砧木

我有兩棵相同品種嘅橙樹, 都係巴西Baia, 即是新奇士嘅正宗. 但兩棵嘅橙肉口感係唔同, 生長習性亦都有差別. 點解呢? 唔係專家, 當然唔敢肯定啦. 不過最近發現佢哋嘅嫁接砧木係唔同嘅, 應該都有關啩?

有一棵幾年前知道係用西柚做砧; 另一棵, 原嚟係用枳做砧嘅.

紅圈圈住就係砧木爆出嘅枝條

 近d睇, 係枳嚟嘅

枳做砧木嘅一個作用似乎係可以矮化

早幾日寫寫下攰得滯走咗去, 依家終於攞番出嚟寫完. :) 晚安.

唔通d雀仔今年都唔中意枇杷?

禮拜五去睇醫生經過見到一棵枇杷樹好多枇杷果, 熟晒都冇人食, 我話乜咁嘥料呀? 文問我哋重有冇? 佢唔中意食枇杷, 所以我淨係摘俾自己食. 我話我最尾一次摘大約十日前, 依家唔使講都冇架啦.

估錯喎, 尋日落去睇下, 咦? 竟然重有! 咁黃都冇雀仔食嘅? 佢哋今年乜事咁客氣呢?