禮拜四再次陪文去見牙醫. 
我諗多數人都係咁, 自己病可能冇咁辛苦, 但睇住屋企人病, 嗰種感覺係難以形容嘅. 開講都話牙痛慘過大病, 所以呢兩個月嚟, 因為文嘅牙痛, 我簡直度日如年. 
睇醫生都已經夠恐怖, 陪人睇喎, 簡直就係受刑一樣, 仲要係睇牙醫! 唉, 都可想而知係咩味囉. 
坐喺客椅上, 聽住好似打磨雲石一般嘅機械噪音, 如坐針氈架. 都唔明咩人諗出嚟嘅, 喺個病人頭頂貼住天花板, 掛咗一部線條優美嘅超薄電視機. 諗下, 喺漂亮電動躺椅上正任人宰割嘅病人, 有邊個仲有閒情去瞄下個電視呢? 
個幾鐘頭, 每分鐘都好似一個世紀咁耐. 好彩偶然聽見醫生問文嘅感覺, 耐唔耐又停低一陣傾幾句閒偈, 從佢哋輕鬆嘅語調中, 我總算可以稍為放低嗰顆懸吊住嘅心. 
老友記話我好人, 肯陪老公睇醫生. 係呀, 一齊累積廿年經歷之後, 你就會明白互相扶持四個字嘅意思架喇.
沒有留言:
發佈留言