蘆筍

今年第四年, 終於有收獲. :)
原嚟自己種係好清甜嘅. 所以雖然要等咁多年, 但食過之後我覺得係值得, 亦鼓勵有條件種植嘅朋友試下種.
不過唔知係我種得唔好定係氣候條件問題, 產量好少.

番薯收獲

長喺樹上面嘅果, 可以用眼睇到佢有幾大, 係咩顏色, 用手摸下佢焾定硬. 生喺地底嘅就真係麻煩, 連佢係咪仍然存在都唔知, 就如洋蔥同薑, 種種下唔見咗嘅我都唔知試過幾多次.

今次種番薯, 我算吸取咗以前嘅教訓, 見d葉俾霜凍到燶咗, 就去掘起佢, 睇下到底有冇果實.

真係有, 但我好懷疑究竟係咪呢個時候收獲, 因為我見到掘出嚟嘅番薯有d木質化咁嘅樣, 甚至爛咗; 但有d呢, 祇係好似條根粗d咁, 根本都未夠時間發育.

點都好啦, 算係有收獲, 其中一個超過一公斤, 我將佢去做咗番薯乾, 睇下好唔好食. 結果係麻麻地, 雖然味道唔差, 但因為糖份含量不足, 令果乾本身唔夠柔軟, 影響口感. 整體都可以接受, 所以等我得閒會將其餘嘅都做埋番薯乾佢.

呢個最大個

乾咗唔夠飽滿, 已經睇出佢唔夠糖分, 含嘅係水而唔係糖

番薯

ah, sam講起番薯, 我都真係有種喎. :) 做乜無啦啦種番薯呢? 唔係特登嘅. 之前見到有番薯賣, 我就買兩個返嚟. 但因為文冇興趣, 咁我就的唔起心肝去整嚟食. 跟住見佢發芽, 我咪用d水浸住佢, 等到佢生根就埋咗佢喺地度囉, 咁就有兩棵囉. 睇落冇乜分別, 應該同一品種啩.

豆

豆角嘅花係紫色, 都幾靚. 豆喜歡熱, 呢排熱就啱晒佢哋, 所以突然間大得好快, 已經有豆.
其實我覺得豆角冇乜好食, 不過原嚟佢好適合用嚟做Tempura, 我估應該係因為佢本身水份少啩.

知唔知呢d又係乜呢? 嘻嘻, 紅豆嚟架, 細細粒嗰d喎(aduki bean). 呢度冇得賣, 呢d豆係03年嘅, 竟然重有發芽能力喎.

我都有番茄仔嚕

早一個月奶奶已經打電話嚟, 好開心咁話佢已經有四個番茄仔. 佢買番茄苗嚟種, 我自己播種子, 佢定植嘅時候我重未移植得, 梗係慢d. 但佢有果, 即是我都有希望啦. 於是日日都去睇, 逐棵監住. 

望嚟望去, 淨係見到花開花落, 果呢? 影都冇. 我就同文講, 我哋嗰d番茄淨係識開花, 唔見結果, 點解呢? 佢話等下就有架喇, 等下啦. 我細細聲ngum下, 話日日都睇幾次, 都係冇. 佢叫我'得意貓仔'('得意貓仔'係我叫healthy仔, 我變咗同healthy仔咁高咁大), 話越睇得多越冇. 嚇鬼啦, 有就有, 冇就冇架啦. 

我繼續成日去睇. 終於皇天不負有心人, 哈哈, 我哋都有番茄仔喇, 重一有就有好多添呀! 不過仍然有一個品種冇, 我移植嗰陣又冇插番個牌仔喺度, 唔記得邊個打邊個, 要等大個d先分到邊個品種最遲.

唐蒿菜

估唔到唐蒿菜d花咁靚, 定估唔到我又種到d菜咁細棵就開花呢? 哈哈! 都話咗我種菜唔掂架啦. 最激死人係本嚟種咗好多, 竟然俾d蝸牛食晒!

 

下次我會試下秋天播種.

豆角

d豆角已經出咗幾日, 但天氣凍, 嚟去都重係見到子葉. :( 

 

其實呢d唔係真嘅豆角, 佢係意大利品種Dolico Del Metro, 顧名思義, 可知有幾長啦. 我舊年種到最長有七十幾cm. 據說呢d豆可以生食, 我就唔會冒呢個險嘞.

其實嗰兩棵係香椿

除咗生長期長嘅, 例如番茄, 荳, 其他生長期短嘅蔬菜我咁多年都冇辦法學好點種. 所以對香椿呢種祇係喺書度讀到嘅 樹蔬菜 一直都心思思想見識下. 

香椿好多時都喺書度見到, 似乎好有名, 種一次就年年都有得食, 重話有獨特嘅香味, 雖然連見都未見過, 但就真係好吸引我. 連高陽喺秣陵春都寫李煦用想吃香椿做藉口扒灰啦, 哈哈.

據說香椿有分紅葉同綠葉, 以紅葉香氣濃而味道佳.

紅葉係中國特產, 所以我就搵紅葉嘅種子買.

出咗兩棵, 生長非常緩慢. 但似乎兩棵係唔同顏色嘅, 唔通咁好彩紅葉綠葉都有? 如果順順利利種大嘅話, 咁我就可以親身比較係咪紅比綠優喇.

左邊綠葉, 葉形偏寬; 右邊紅葉, 葉形窄長

紅葉

綠葉

番茄

今年播咗四個品種. 

嗰日冇落雨, 攞出去照一照太陽, 諗住四月幾, 冇乜問題, 點知一個回馬槍凍番, 就俾d霜燒傷咗. 原本因為冇太陽已經夠黃, 依家重燶埋添. 好彩日間氣溫唔低, 所以凍唔死.

2號重好地地架

blog不過係說一點瑣事 :)

恭喜發財! 祝各位老友記身體健康, 事事如意.

一年真係好快, 今日又係年初一.

呢度嘅年初一就好似平日咁, 最大唔同就係電話不停. 下午五點幾之後一切都回復平靜. 咁我就自己去松園行下. 本嚟叫埋隻爛貓, 但佢唔睬我, 咁我就呃隻貓仔跟我去. 不過行到一半佢就唔肯行喎, 嘻嘻. 

我唔理佢, 自己快快行落山脚睇下我d西洋菜, 好彩, 重喺度.

嗰度有好多水, 我喺度種西洋菜已經種咗好多年, 但每次都好快唔見咗, 因為俾d羊食晒. 我已經有兩年放棄, 不過今年又試下. 呢d係初初種嘅時候影嘅, 今日見好似大咗小小, 不過隻貓仔唔跟我行, 我就要快d返轉頭帶佢返屋企, 冇影相.

大寒豆小寒豆

蠶豆同荷蘭豆號稱大寒豆同小寒豆. 顧名思義, 就係唔怕凍啦. 又因為蠶豆好易種, 所以我多數都會種.

呢d相係早排影, 依家已經大棵d.

 

不過唔記得, 所以遲咗種荷蘭豆, 佢依家都重好細

今年有種咩呢

 有部份已經食得

洋蔥

人種洋蔥我種洋蔥, 乜解究人哋種得咁大個我種得咁細個架?! 大嗰個都係得六七cm咁上下架咋, 激死我.

 

冇月餅食, 都唔知原嚟今日已經中秋節. 咁就祝各位中秋快樂啦.

凍定唔凍問菜芯

最近每次出街都見人哋大車細車咁喺度運柴, 鄰居呢, 亦都砌好一堆一堆高一高嘅柴堆, 一切景象都係準備緊過冬. 

咁我又學人準備過冬啦, 去執松果囉. 不過我唔係執俾自己, 費事咁早喺度阻碇. 我用嗰d紅白藍膠袋裝咗一大袋車去俾奶奶, 佢好開心. 文話唔知佢做乜咁開心. 我話你幾好彩呢, 咩都有我搞掂晒, 你梗係唔知做乜咁開心啦.

早兩日落去小松園, 都未行到盡尾, 就已經凍到我要走番轉頭. 當時着住一件粗條燈心絨外套, 夠晒厚架. 我心諗, 今年夏天咁涼, 冬天可能好快嚟都唔定嘞.

點知今日呢, 嘩, 好熱呀, 今朝去噴下草, 件衫都濕咗. 聽日約咗醫生, 希望文可以早d啦, 如果晏就好熱, 因為好遠呀.

我本嚟以為天涼, 啱種中國菜喇啩? 咁咪種咗白菜呀, 菜芯呀嗰d囉, 點知原嚟都係唔啱, 睇下我嗰d菜芯都重未可以移植就已經繁花似錦喇!

有個節瓜仔

都唔知係因為氣候根本唔啱呢定係純因為今年唔夠熱, 嗰d絲瓜全部都唔得, 未夠筷子咁粗就自動枯死. 反而節瓜出咗之後一直都唔郁, 但最近竟然生咗個瓜仔出嚟.

小南瓜

呢個瓜仔係舊年喺超級市場見到, 好細個, 特登買一個返屋企諗住攞佢d種子, 咁細個啱, 唔使劏開又嘥咗.

我自己種到出嚟冇核, 成個實嘅. 希望有一個有幾粒種子啦, 因為佢好好食呀, 唔係水汪汪, 但又唔係成舊粉咁. 而係軟軟糯糯咁, 口感好好, 連文都有食.

我重用佢做咗d醬送俾小朋友, 好受歡迎