珍惜呢一刻

尋日一返到屋企就得到一個消息, 有位好朋友中風.

報消息嘅人唔肯定, 佢係想通過我哋證實消息是否可靠, 話係尋日上午嘅事.

成晚都冇辦法聯絡得上佢屋企人, 側面證實確有其事. 可以做嘅就係搵住佢附近城市嘅朋友去打探.

今朝嘅消息話佢已經喺普通病房, 但冇詳情. 希望唔係大問題.

最後見佢係舊年九月尾, 喺一個好多人嘅聚會. 當日有人拍我, 轉頭一睇係佢, 好開心. 見面攬攬錫錫係我哋習俗, 佢話索下油先. 我話我同你邊個都索唔到邊個油, 大家冇着數. 哈哈! 佢媽媽係澳門人, 好刁鑽嘅廣東話佢都識. 

八月時本嚟約咗見面, 文有事臨時取消咗. 佢太太重特登打電話嚟話以為有機會見到我,  大叫可惜.

我同佢都係瘦人, 佢同我年紀相若, 最多大我一年. 所以消息令人震驚, 唔係肥人先中風機會大d咩?

人真係話唔埋, 請珍惜呢一刻.

又做下白老鼠報告

YB執笠, 盡管喺城中唔見得有幾大震動, 但依然令一眾YB遺民忙亂一陣子.

我都算得上遺民, 因為我嘅blog雖然升呢之前早已經結束, 但當年曾應承過blog友保留, 至今仍係YB 成員.

依家話執笠, 首先當然係要另搵地方安置佢啦. 

搬去邊好呢? 實際經歷比較下.

1.Tumblr 

yahoo話搬去Tumblr好方便, 一打包就搞掂. 咁我就去註冊. click佢嘅link入去, 即刻就係一個註冊嘅格式, 解釋, 說明, 宣傳乜都冇. 以為路徑唔啱, 將連結删到最少字, 入去, 依然係'註冊'.

好啦, 或者註咗冊先多d嘢睇啩? 冇. 註咗冊, 要揀三個blog.係咪似傳銷? 係, 就係似傳銷. 唔使講喇啩? 行到呢步你仍然有興趣? 哈哈! (依家成日收到佢貓, 催促你去填充你個blog. :) )

2. sinablog

將咸豐年開嘅sinablog搵番出嚟. 當年, 開YB之前開嘅, 後尾放棄咗先開YB同blogger. 

又估佢唔到, 咁多年之後佢仍喺度, 一切有效. 就用佢啦.

搬開頭覺得幾好用, 算順利. 整下整下發現佢唔妥. 喂, 私人blog嚟架, 設咗密碼架, 做乜個老鼠指住標題就可以睇到內容嘅? 問sina點整先可以搞番掂. 冇人覆, 但個錯誤係好迅速修正咗. 不過另一個錯誤, 設密碼帖子嘅回應, 仍然可以喺首頁嘅最新回應度睇到, 包括回應人同內容摘要.

都算, 成個blog唔公開, 咁嗰d悄悄話就唔使驚洩露啦.

又有問題嘞. 搬帖嗰陣一時唔記得對日期, 發現次序唔啱之後去改, 有時得, 有時唔係即刻得, 有時直情就唔得. 編輯顏色亦係一樣. 我唔識電腦, 邊度出錯唔知, 淨係知道佢唔聽話.

都唔止, 長嗰d, 例如最後嗰兩篇, 有好多回應, 但support唔到咁長, 斬開十幾舊搬去回應度, 每一個回應都要驗證碼, 試過三四次打番轉頭, 煩. 

唔想再用佢.

3.  google+

google+, miya用緊, 想寫幾句嘢俾佢, 要我起碼先註冊一個簡易嘅google+戶口. 簡易, 咪求其囉. 唔得. 連求其填一個出生日期都話唔得. 

我不嬲中意自由架嘛, 想當年我已經好唔滿意YB要註冊會員先可以留言, 但人哋覆我話係為咗保安理由, 咁我覺得都合理, 所以繼續用佢. 但你google+要求咁多資料為乜呢? 我覺得反感. 所以走人.

well, YB, Tumblr, sina, google+, 點睇? 

我: 除咗冇公仔同私人回應, 都係blogger最好.

共勉

妳話我令妳心靈平靜, 果如妳所言, 係我嘅榮幸, 多謝妳, miya. 

我自己未必時時都咁平靜. 但有時睇下人哋寄俾我嘅文字, 又不乏我所認同. 節錄一d出嚟大家睇下, 哲理同智慧兼備, 都應該有d益處. 


被恨的人沒有痛苦，恨人的人卻終將遍體鱗傷，所以，絕不去恨人。

緣分是本書，翻得不經意會錯過，讀得太認真會流淚。

 錢有兩種：花掉的是錢，是財產；沒花掉的是“紙”，是遺產。

長得那麼美那麼帥氣，自己卻不知道，這就是氣質；那麼有錢那麼有才華，別人卻不知道，這就是修養。

把脾氣拿出來，那叫本能；把脾氣壓下去，那叫本事。

人生最大的煩惱是從最沒有意義的比較開始。

學會知足，這世界總有不如你的人，也總有比你強的人，當我哭泣我沒有鞋子穿的時候，我發現有人卻沒有了腳。

人活着一天，就是有福氣，就應該珍惜。

雞, 俾唔俾佢啼?

尋日(11-09)敝國嘅新聞報導, 有一條好有趣, 又幾令人嘆息嘅.

話說一村婦養咗幾隻雞, 但公雞却面臨被宰命運, 原因係村婦有一個從城市搬入嘅鄰居不滿佢嘅公雞每晚高聲啼叫, 覺得擾人清夢實在太豈有此理, 所以發律師信俾村婦要佢劏雞, 否則索償.

村婦認為啼叫係公雞嘅權利, 就如人講話, 因此惹上殺身之禍並不合理.

爭執最終驚動警察. 而警察竟然又真係去量度公雞嘅聲量. 唔度猶自可, 一度, 真嘅超過咗 --- 結果, 投訴成立.

但警察又唔拉得隻雞, 點算? 於是叫雙方訴諸法律.

投訴人(25歲, 女)話, 佢祇想瞓得安樂, 返到屋企可以安安靜靜.

養雞人(40歲, 女)話, 個個養嘅雞都叫, 佢唔會因此而劏咗隻雞. 佢會向法庭為隻雞討公道.

雞會有咩命運呢? 睇過點.

公雞同主人

有d砧木會巨化

假如完全冇優化作用, 咁就失去嫁接嘅意義. 所以嫁接對選砧通常都係有明確目的, 例如果樹, 想方便管理, 當然係矮化好, 重要睇下想早熟定遲熟, 諸如此類; 用嚟做防風林, 點都想佢高大d啦; 其他, 防病害, 耐旱, 都係考慮因素, 總之抗逆能力要好.

不過好多時要因應佢同接穗嘅親和力, 效果唔係最理想都冇辦法.所以好多時買番嚟嘅樹苗, 種下種下, 佢嘅優劣慢慢就會顯露出嚟. 早前見到用枳嫁接嘅橙有矮化咗. 但呢棵西梅明顯係巨化. 我自己用桃樹嫁接過, 亦都係巨化, 所以我相信佢有可能都係用桃做砧. 桃砧嘅好處係耐旱, 但短命.

聽我話, 剪短d地拖啦

我時時都懷疑, 好多用品, 特別係工具嘅設計者, 佢哋究竟有冇親自用過d產品先定案生產嘅呢? 例如每個家庭都要用嘅地拖, 點解要做到咁長? 佢哋知唔知係毫無必要? 起碼有三個缺點: 要用多d力,嘥多d時間扭乾, 浪費材料.

嗱, 通常買返嚟嘅地拖最短都九吋十吋, 長嘅甚至十一吋

聽我講啦, 返去剪短d, 七至八吋就適中, 試過你就知慳幾多力省幾多時間.

真架, 用家先可以設計到好產品嘅.

Yayahoo 搞乜鬼呢?

好耐冇上去 yayahoo 個 blog, 今日上去睇下, 吓! 變晒樣嘅? 白濛濛一d顏色都冇!

上次上去, 佢有個提示叫搬竇, 我叫佢遲d先提我, 但佢竟然冇俾我最後通知就幫我整成咁喎, 搞乜呀!

但點解 sam 同白田先生個blog 又可以保持原樣嘅呢?

連'坐'嘅觀念都兩樣

我哋係鄉下地方, 但路邊都尚且設置櫈椅供路人歇腳

 

且看一篇可笑嘅報導:

见过收费板凳吗？投币 钉子才会下去

烟台公园收费板凳 ，坐前投币，钉子就会下去。

这个社会除了钱，还认什么啊？

照計強國依家錢多到用嚟掟人, 唔需要搵呢種錢喇啩? 唉, 好心積下福啦! 

有人用我email 喺youtube開a/c?

前晚收到youtube一個咁嘅通知, 又一次話俾我知yayahoo d保安真係好差好差. 各位小心小心!

洗衣機試用報告之二

部洗衣機嘅賣點係佢嘅direct drive motor, 佢行起上嚟係好靜好定嘅, 尤其係乾衣嘅時候就更見佢好處.

佢乾衣同傳統洗衣機一d都唔同, 佢係開始時慢慢轉, 然後加快, 但唔會一次乾完, 而係停低之後來回咁轉, 揚開d衫, 又再乾過, 咁d衫係乾得好均勻嘅.

到最後兩分鐘佢會以扭螺絲嘅節奏, 順時針半圈, 半圈, 半圈, 半圈, 做四次, 反時針半圈, 半圈, 半圈, 半圈, 又做四次, repeat到完. 所以d衫攞出嚟唔會扭埋一舊, 係鬆嘅, 燙衫亦容易好多.

乾衣速度有400, 600, 800, 1,000, 1,200, 1,400, 免乾七個選擇.

洗衣機試用報告1

個洗衣機因為冇乜強烈嘅預設要求, 所以文話中意LG個樣, 咁就聽佢講買咗個LG. 雖然我覺得whirlpool嘅殺菌功能好實用.

好唔好? 得閒就逐樣講.

不過首先有兩樣嘢, 都唔知係誤導定係誤解.

1. 48cm 門以為好大? 係錯嘅, 隻門大, 唔等於入嘢容易, 因為其實個窿一樣係標準嘅30cm.

2. 9kg 可以洗好多嘢? 係錯嘅, 可以洗得郁45件衫, 但未必裝得落45件衫, 因為部機嘅size實情同5kg嘅冇乜分別, 60 x 64 x 85, 塞兩個枕頭差不多喇.

自己噏

我哋今年唔係好熱, 除咗早排有幾日熱到成三十六度之外, 多數時間都係廿二三度, 好舒服嘅天氣. 但對作物嚟講當然係冇咁好啦, 就算係水果都有咁甜. 不過話過幾日又熱喎. 都好. 頭先啱啱剪短咗頭髮, 好涼爽, 成個頭都好似輕咗.

早兩日見到話美國有餐廳規定唔俾六歲以下嘅小朋友入去. 吓? 乜有人好似我咁黐線嘅? 哈哈! 老實講, 呢個決定真係英明架, 你諗下, 冇咗呢d小魔怪, 耳根清靜, 食都食得安樂d, 咁d生意肯定好d啦, 係咪?

有時喺超級市場見到嗰d小魔怪推住部購物車喺度橫衝直撞, 又或者擘大喉嚨鬼殺咁嘈, 真係想兜巴星佢父母.最最討厭就係冇家教嘅細路. 刻薄? 我唔會否認架.

千祈咪上當

早幾日, 發覺雜件箱有嘢, 去睇下, 咦, 係oswald寄俾我喎, 已經好多日.

攞番佢出嚟, 照字面睇, 以為係oswald邀請參觀佢相簿, 咪click入去睇囉. 要註冊, 都正常嘅, 註啦.

到第三步, 無啦啦將我yahoo個通訊錄嘅人全部攞晒出嚟, 叫我送禮物俾佢哋, 有隻熊仔, 有朵玫瑰, 重有一樣唔記得係乜. 我即刻警覺, 咪住, 淨係送俾我自己, 睇下係乜先, :p , 嘻, 有鬼禮物呀, 咪就係同下面一樣樣, oswals寄俾我嘅所謂邀請囉!

所以, 各位, 當你見到有一封咁嘅嘢, 如果你唔想設立相簿, 唔使理佢架.

不過公道講句, 佢冇hi5咁令我反感, 因為hi5根本唔會同你講任何嘢, 佢會引誘你登入, 但祇要你一click登入, 佢會將你電腦裡面所有email地址偷晒, 直接幫你發邀請出去.

好彩有google, haha!

上次sam講起司徒華同張文光, 我諗起一首講吳三桂嘅詩幾啱使嘅. 但老人癡呆, 記唔全, 又唔得閒, 所以就dum低咗. 趁住依家等緊食嘢, 就上網搵咗, copy出嚟:

李陵心事久風塵，
三十年來詎臥薪，
復楚未能先覆楚，
帝秦何必又亡秦。
丹心早為紅顏改，
青史難寬白髮人。
永夜角聲應不寐，
哪堪思子又思親。

嘻嘻, 係咪啱呢?
唔傾住.