奇異果花跟進

影番早兩日嗰幾朵奇異果花, 雌性嘅花好快謝, 要結果吖嘛. 但雄性花就襟開d, 成個禮拜都重喺度. 所以人哋多數種幾棵雌性果樹, 祇配一棵雄性果樹做授粉就夠.

雌性花中間嘅淺綠色物體就係果實嚟架喇

雄性花仍盛放

葉腋生出嘅每一串都有幾個花蕾, 唔怪得話會果比葉多啦

奇異果雌雄花

好似應承過sam 影奇異果嘅花上嚟, 但冇機會. 呢兩年都唔覺佢開雌花, 祇係到落葉嘅時候見到幾個疏落嘅果實.

舊年十一月嘅時候有人嚟, 見到得咁少果, 佢話, 剪得好嘅話, 果比葉還多. 吓? 原嚟要剪架? 書都冇講. 文望下我, 啱想出聲, 俾我用眼神制止咗. 我梗係醒啦, 佢唔使出聲我都知佢又要話請人做. 我重申, 除非我表明放棄, 否則, 花園果園我係唔會允許任何人插手嘅.

一月, 諗住已經深度休眠, 所以有一日捉住文幫我扶梯, 我自己親自上去棚架度剪. 之後, 到三月尾, 一d動靜都冇, 以往二月已經開始萌芽, 唔係俾我整死咗啩? 哈哈, 虛驚啫, 依家咪開始開花囉. 結唔結果係後話, 等過兩個月揭盅啦.

太高, 就唔到角度影得清楚d, 今日雨天(幾凍, 十二三度), 光線亦麻麻地. 惟有影多兩張. 

雌花, 花後結果

 

雄花, 花後枯落

西柚內膛枝結果

書係咁話, 但冇詳細內容.
咁我留意下, 現象係吻合嘅. 原因, 我估係因為西柚好少新枝開花. 其他柑橘類, 尤其係桔仔, 新枝開花嘅多.

桔仔

橙

西柚

睇多幾張西柚, 兩年生枝開花

睇多幾張橙, 新老枝都開花

白得耀眼

 

橘越淮而枳?

真係南橘北枳? 梗唔係啦, 呃咗你兩千年囉, 查實兩個唔同屬嚟架. 嗱, 睇下佢哋d葉先啦, 橘係單葉, 枳係複葉嘅.

 枳葉

 橘葉

我無啦啦做乜種棵枳呢? 有古講, 唔係特登種嘅. 

可能枳耐寒粗生啩? 所以有d柑橘類果樹會用佢做嫁接嘅砧木. 我早幾年買嘅一棵青檸, 就係用佢嫁接嘅.

棵青檸第一個冬天就已經凍死咗, 但枳嘅根唔死, 所以佢仍然繼續生存. 到今年已經有花, 如果唔將佢鏟走, 跟住落嚟嘅日子會結果, 根據唔同成熟度採收, 就成為中藥嘅枳實同枳殼, 然後可以開單味藥材舖喇, 哈哈!

 枳花

其實熱情果嘅花花形幾別緻

枇杷

今日落果園採玫瑰做玫瑰糖, 順便摘咗幾個枇杷果返嚟, 樹太高, 摘唔到.

好甜, 不過好多核.

又順手影兩張玫瑰

pawpaw結果

因為pawpaw第一年移植開花, 感覺好新鮮兼好奇, 所以要密切d記錄佢嘅生長過程.

有葉喇

開始結果, 希望佢唔落果就好嘞




呢個大概係雌性花, 花後結果

我估呢個係雄性花, 花後脫落

藍莓花

除咗杏子花之外, 藍莓花嘅顏色亦係相當典雅, 淺粉紅嘅花蕾之後係帶粉嘅藍綠色花托之上開出雪白嘅鐘形小花, 淺淡之中又毫不單調, 幾啱我口味.

蘋果fuji

我自己嘅pawpaw

初初見到網上嘅相, 點解人哋嘅花係紅色, 我嘅係由啡轉綠嘅? 點知原嚟慢慢佢又由綠變紅嘅喎.