護腕到貨

上個禮拜去試護腕, 呢個冇我尺碼, 另一個我唔中意, 物料質地硬, 裁剪唔貼手, 顏色黑嗎嗎. 我話都係呢個舒服d. Dr Feranda 即刻幫我訂. 
今日去攞咗. 我預期比臨時嘅好, 但用咗兩個鐘, 發覺有d失望. (ah, 原嚟重有美國製造, 唔係搬晒去強國)

之前暫時用住呢個, 拉緊可以痛少d, 但手好容易腫, 要間中鬆開.

新年前影嘅Healthy

剝咗牙都繼續痛? 喉嚨亦痛. 29號去睇醫生. 原嚟剝牙縫針嘅線冇全部甩晒, 一個loop連埋結藏咗喺入面睇唔到, 搞到發炎, 所以痛. 醫生剪開將佢攞咗出嚟, 冇事. 不過喉嚨依然痛, 似乎唔關牙事.

聲亦開始沙. 終於年初一晚大爆發, 傷風, 咳, 發燒.

新年流流, 始終有d介意, 唔想去睇醫生, 自己食d panadol cold & flu 嗰d嘢. 今日瞓醒發覺退咗燒, 即刻心情輕鬆.

今日去唔去做治療好呢? 其實我唔係懶, 嗰d治療唔覺得幫助好大, 但我都繼續耐住性子去做. 我祇係怕傳染俾人. 不過請假多咗, 中心又唔高興. 睇怕都係要去.

等陣睇下點先啦. 依家, 就睇貓, haha, 都係佢開心.

好少呢個方向見到彩虹

尋日朝出門一轉身就見到彩虹, 兩條, 好少見呢邊(應該係西北)有彩虹, 即刻返屋企攞相機影咗佢.
諗住尋晚貼上嚟, 但煮飯嗰陣切咗紅黃辣椒各一隻用嚟做裝飾, 原嚟好辣嘅, 已經洗咗好多嘢, 照計隻手都應該乾淨啦, 點知食完飯之後唔知點掂到隻眼, 辣到我成晚流眼水. 今朝隻手一濕水仍然覺得辣嘅.

呢張仍隱隱見到兩條彩虹

聖誕彩雲

我發覺每年聖誕前後, 喺日出前好多時都有好靚嘅彩雲, 雖然時間好短, 但顏色鮮艷耀眼, 賞心悅目. 可惜嘅係我部傻瓜機一直對藍同紫都有偏色問題, 本嚟有粉紅色好靚亦影唔到, 冇辦法如實反映佢嘅美麗. :(

Healthy仔嘅聖誕禮物

我好討厭買禮物, 聖誕過咗, 一月又有三個生日禮物, 真頭痛.

不過買俾Healthy仔就一d都唔使頭痛, haha.

文話Healthy仔蠢, 以前Lucky係唔食呢d嘢嘅. Healthy仔反而唔食我哋嘅食物, 佢除咗平時食餅乾之外, 早晚各食一餐呢d嘢.

聖誕前我收到一張折扣咭, 七五折, 24號到期, 啱好用得上, 哈哈! 

 我哋以前有隻貓叫小魔怪, 同呢隻貓好似樣

新鮮送到聖誕小食

寫寫吓回應, 有人揸車經過, 送咗一盒葡撻, 一盒傳統聖誕小食嚟, 話趕得切, 仍然熱辣辣, 叫我即刻食. 趕咁快就想我食新鮮熱辣, 唔可以辜負佢一番心意, 即刻開盒.

Healthy仔咁啱瞓醒嚟搵我, 咁梗係佢大晒啦, 攞一個先餵佢, 都食咗兩羹架.

呢個 filhós 好好食, 係我最中意嗰間

 

 好軟滑好鬆化

曲奇同合桃酥

外面橫風橫雨. 不過心情好好.
我終於的起心肝去做曲奇, 亦做咗d 合桃酥. 

早幾日做咗一d, 用錯粉, 唧嘅花散晒. 太耐冇做, 幾乎連支唧筒都唔記得點用. :)

我雖然血壓血糖正常, 但偏偏膽固醇就高到得人驚, 報告未經醫生, 本身已經出警告字句. 不過可能因為其他項目d數字靚, 醫生仍然俾我揀, '要唔要食藥?' '唔要'. OK, 俾妳一年時間. 所以我係守緊行為.

不過今日心情靚靚, 我特意特赦自己, 所有曲奇餅食隨意隨量任食. 依家個胃大概有一公斤豬油加牛油.

唔理架喇, 唔放縱下, 容乜易抑鬱架! :)

今次嘅合桃酥餅譜:
( 25g一個, 大約30個份量)

麵粉 400g
糖 170g
豬油 120g
小梳打 3g
水 45g
蛋 半隻, 另半雙掃餅面

165度C, 焗15分鐘

Healthy 睇電視

哈哈, 佢睇電視唔止睇, 重會去捉d會郁嘅物體, 幾開心呢!

 

時間真係過得快, 2012年嘅4月, 佢重係得咁細隻貓仔

重唔落葉嘅?

真係唔知點解釋, 每朝遍野白茫茫一地霜, 照計番石榴應該一早落晒葉, 但今年唔知黐咗邊條線, 除咗最嫩嘅頂葉軟軟地之外, 其他嘅到依家都好地地.

 

惟一嘅果實, 大約得六. 七 cm 大, 食唔食得呢?

總係有d吸引力

樹林係一個好地方, 開心同唔開心都係好去處. 

有陣時帶埋Healthy仔一齊. 佢好玩過Lucky好多. 有陣時佢走, 我做追, 有陣時我走, 佢做追. 次次都唔夠佢走得快. 不過佢好識玩, 好好笑, 走到冇晒力, 笑到冇晒氣先返嚟.

去d樹林度遊蕩, 另外被吸引嘅係d菌類, 乜菰乜耳嗰d. 潛意識當然係'食唔食得嘅呢?' :) 冇, 我一定唔會亂咁食, 我好怕死... 唔去. :)

 見到好多橡子發芽, 先生條根扎入個地度