西江月

七月嘅時候白田先生巧借陶淵明嘅 '池魚思故淵' 出咗一篇網誌懷念佢童年生活過嘅地方. 而詩句又引發起我對比古人同現實嘅感慨, 有感於淡薄出塵者少, 逐利爭名者多, 溯本思源者寡, 安於樂逸者眾, 填咗一首西江月. 

sam 同miya講開依家嘅香港同中國, 令我又諗起, 抄佢出嚟. 畢竟陶潛顏子都唔再返嚟, 現實多嘅係孟母同阿斗.


西江月

一向少懷五柳
從來多效三遷
魚池安逸勝深淵
思蜀歸根何鮮

利祿轉頭泥淖
功名過眼雲煙
自纒繮鎖實堪憐
陋巷簞瓢毋怨

石榴紅

張相影於五月下旬. 

當時有感, 填咗首浪淘沙

又見石榴紅

蝶繞花叢

翻飛戲逐兩相從

綠翠黃深皆有致

樂也融融

不過萍水逢

時屆還終

夕陽西下水流東

都是一般閒意志

來去隨風

等我譯番首詩先 :)

繁花染樹紅

寄託我情衷

每盼風吹送

隨伊入夢中

星期日檔案 居港十年情

飽學思回饋

無私自雅然

今天憐弱小

昨日我堪憐

頭先喺依度http://www.hkreporter.com/talks/thread-1277991-1-1.html睇到呢集星期日檔案, 都幾感動嘅. 有人重寫咗首詩添(原詩睇下面). 我亦步韻而和.


原詩 
談吐知書禮
慈悲志雅然
親恩常念報
義女我猶憐

你若無情我便休

頭先首歌, 旋律同歌詞將個意境營造得相當令人投入.

講起歌詞, 依家d人好熱衷尋找其中一句 '你若無情我便休' 嘅出處. 我冇咁嘅修養, 連金庸都未睇過, 絕對講唔出佢嘅出處.

不過啱啱見到有人寫咗一首提及暗戀嘅詩, 覺得有d窩囊(係, 人總有窩囊嘅時候), 我又嚟寫幾句, 都算湊個熱鬧.

直問人生幾個秋

千言待訴語還留

心聲欲寄無由寄

你若無情我便休

無奈花自知

花嘅生命其實好短暫. 頭先落果園, 見到早幾日重繁花盛放嘅桃樹, 有d品種已經差不多花瓣落盡, 取而代之嘅係青青嘅新葉. 寫咗一絕:

嫩綠着新枝

飄紅未允遲

余來伊又去

落得兩相思

初識荷花

親手種荷花, 對佢嘅生長形態特性有咗初步認識, 幾新鮮嘅, 所以草咗首七律記錄一下. 本嚟諗住有心情嗰陣先慢慢執下佢, 但因為家母嘅事實在提唔起精神, 始終冇做到. 難得oswald睇得起, 咁我就抄上嚟獻醜, 請各位老友記幫手改好佢啦.

喺呢度順祝各位新年快樂. 亦希望我自己可以重拾心情, 回復常態.



香凝艷粉態翩翩

欲折纖腰最可憐

昨夜隨星辭舊夢

今晨伴日瞥新天

清圓水面彤雲蔽

翠卷風中綠浪牽

但願深泥能庇護

毋虞暖夏若霞煙

稍抒心懷

生離死別最堪傷
更恨東西聚不常
任道兒孫齊福壽
難解思親百結腸

答tony

話盡快寫, 終於又拖咗咁耐先動手. 同tony講聲對唔住先.
其實都係起承轉合嗰d嘢, 都冇乜好寫. :D

何曾昨夜燭花開 : 以前民間相傳結燈花就有喜事或者有貴客到訪. 當然係咩樣我就唔識啦, 借喻冇預示咁解啫.

蓬蓽生輝未敢裁 : 就係因為冇任何預示, 所以雖然見到滿屋生輝都唔敢相信白田先生大駕光臨.

想必軍師施絕技 東風渡得故人來 : 轉念一想, 實係孔明又借東風, 所以先吹咗老友記嚟. 呢度喺地理上係有d巧. :)

紅着臉為七絕註解

真係唔好意思tony, 要你等咁耐.

其實我寫嗰d所謂詩詞同文學扯唔上關係嘅, 祇係覺得簡潔咁解嘅啫, 所以佢嘅價值就同任何簡短嘅留言一樣, 好處就係短. 壞處就梗係力不從心, 所以未必可以令人明白我寫乜鬼啦. 所以今日都係要用番多幾隻字嚟解話. 呢d叫不自量力所以自作自受. hehe.


初識大花蔓陀蘿嘅背景係因為貼張大花蔓陀蘿嘅花相賀白田先生開blog, 隨即又覺得好寒酸, 所以就加寫一首七絕, 內容係描寫我係點樣認識呢朵花嘅.


斜懸畫角啞無聲 : 大花蔓陀蘿嘅花係垂掛喺樹上, 就好似一個吹唔響嘅號角咁

翠裡楊妃舞宿酲 : 因為佢嘅花都好大朵, 絕不輕盈, 就如楊貴妃醉醒嘅時候跳舞一樣. (呢個品種係粉紅色)

每至黃昏荀令訪 : 東漢尚書令荀彧嘅衫常帶濃香, 據說佢坐過嘅地方三日之後都仍香, 呢度借嚟描寫大花蔓陀蘿係夜晚香嘅花.

窺鄰一瞥直心傾 : 借用鄰女窺牆嘅典故有兩重意思, 一係以宋玉比喻大花蔓陀蘿嘅美, 二係寫實, 因為我初識大花蔓陀蘿係因為奶奶嘅鄰居有種, 初時我唔識, 亦就覺得佢幾靚而已. 有一個夏天傍晚發覺一直以為係花香來源嘅嗰叢玫瑰已經完全冇花, 向鄰居打聽之下, 原嚟香氣係來自佢嘅大花蔓陀蘿, 即刻問佢要咗一段樹枝嚟種, 種到如今.

頭三句主要係描述花嘅外貌, 後一句寫終於認識佢.


另外一首又要等一等. 盡量呢兩日寫埋佢. 我覺得打字好攰, 好花時間呀. hehe.

賀白田先生blog

白田先生開咗個blog, 我呢, 除咗花, 有乜? 冇. haha. 咁就貼張花相啦. 好彩, 後尾又亂咁配咗首詩, 算唔使得梳蕉咁失禮啦. hehe.

記初識大花蔓陀蘿

斜懸畫角啞無聲
翠裡楊妃舞宿酲
每至黃昏荀令訪
窺鄰一瞥直心傾

記白田先生大駕光臨

何曾昨夜燭花開
蓬蓽生輝未敢裁
想必軍師施絕技
東風渡得故人來

情為何物

個垃圾房本嚟就話用嚟堆放垃圾嘅, 但不務正業, 淨係吹水, 咁耐都未開工做嘢. 今日要郁手喇, 打開隻門, 搬一舊垃圾入嚟先, 算係開個頭都好吖嘛.

就由呢首七絕開始啦.

情為何物

七絕

一朝得意勝春風

百劫甘心困獄籠

最恨彌天無好計

丈夫氣短折英雄