我都做呢d無聊嘢

呢度嘅復活節係大節, 天主教國家嘛, 所以有好多傳統嘅節日食物.
雞蛋好多時都做主角. 有一種甜麵包裡面有雞蛋, d蛋有殼添嘅. :) 
我從嚟都唔會買呢d嘢食. :)
不過呢排有d無聊, 因為好多嘢都做唔到, 所以做幾個應景, 當然係我自己嘅'創作'啦. 要啱自己眼又啱自己口至得架嘛, 自己配方自己造型又自己食, 就唔使理咁多. 哈哈.
文中意肉桂, 所以用肉桂做主調, 文話好食.

通常係大個, 裡面有幾隻蛋. 但我中意細細個, 容易焗, 食亦乾淨企理, 所以買細碼蛋嚟做.

剝咗個焗杯係咁. :)

其實自己爆豬皮唔難嘅喎

以前聽人講爆豬皮, 無論係油爆定沙爆, 都係好麻煩嘅, 又話唔可以帶任何嘅肥肉, 要刮到好乾淨.

咁當然係買啦, 香港有得賣嘛. 不過每次食豬皮, 食到d毛拮嘴拮脷就好冇癮. 所以用薑蔥水燙過之後就係掹毛, 用個鉗仔係咁揀d毛嚟掹, 好辛苦, 因為佢通常係燒咗d毛, 但個毛頭喺裡面, 掹佢出嚟好麻煩. 

呢度冇得賣, 而文又中意食豬皮, 所以咪惟有自己試下諗辦法囉.

原嚟冇傳說中咁複雜, 用焗爐就可以架喇, 而且亦不必好乾淨, 帶住肥肉係冇問題嘅. 
爆好之後用個普通玻璃樽裝住唔會焾, 當小食隨時食都酥脆. 最大好處係爆之前可以自己將毛處理得好乾淨, 食得好開心.

曲奇同合桃酥

外面橫風橫雨. 不過心情好好.
我終於的起心肝去做曲奇, 亦做咗d 合桃酥. 

早幾日做咗一d, 用錯粉, 唧嘅花散晒. 太耐冇做, 幾乎連支唧筒都唔記得點用. :)

我雖然血壓血糖正常, 但偏偏膽固醇就高到得人驚, 報告未經醫生, 本身已經出警告字句. 不過可能因為其他項目d數字靚, 醫生仍然俾我揀, '要唔要食藥?' '唔要'. OK, 俾妳一年時間. 所以我係守緊行為.

不過今日心情靚靚, 我特意特赦自己, 所有曲奇餅食隨意隨量任食. 依家個胃大概有一公斤豬油加牛油.

唔理架喇, 唔放縱下, 容乜易抑鬱架! :)

今次嘅合桃酥餅譜:
( 25g一個, 大約30個份量)

麵粉 400g
糖 170g
豬油 120g
小梳打 3g
水 45g
蛋 半隻, 另半雙掃餅面

165度C, 焗15分鐘

得意麵包仔

年初大風吹倒好多松樹, 我哋呢邊嘅松林重未有人理, 不過近奶奶嗰邊嘅已經開始有人做緊. 佢哋嗰邊d樹老好多, d樹皮好厚, 吋幾兩吋(其實以我嘅觀察, 樹皮厚薄同樹齡冇必然關係), 我叫奶奶唔好掉(d松柴燒之前通常都要去皮, 否則燒嘅時候會爆到周圍都係), 留番俾我. 

去奶奶度攞樹皮, 佢中意食我做嘅蛋糕, 梗係做一個順便攞俾佢啦. 做開蛋糕, 唔差在做幾個麵包仔俾自己食. 嘻, 似迷你型嘅baguette, 係咪好得意? 

糯米比risotto好

我中意食糯米. 但個個都話糯米 '滯' (其實我唔覺架), 咁我就試下用risotto嚟代啦.
不過我嘅結論都係頑固嘅堅持: 糯米比risotto好. :)

我唔中意食雞, 做個樣陪食. 不過呢個炸豆角我就中意嘅, 名稱大概係 '花園魚仔' , 做法同tempura咁上下, 不過脆漿我用自己配方, 襟脆.

risotto 綠豆釀雞翼 (牙籤都未掹 :) )

簡易酸乳酪(yoghurt)蛋糕

簡單在唔需要好多架生, 甚至唔需用磅量, 用番個乳酪杯仔做比例就可以, 因為份量唔需要好精確.

材料亦係好簡單, 一杯乳酪, 一杯油, 四隻蛋, 四杯糖, 四杯麵粉, 加兩茶匙發粉

所有材料

 用原味乳酪

先薄薄地處理個糕模(我個瓷模超容易清潔)

 將材料用手持打蛋器打成糊狀就可以, 好快

 

倒入模中, 180度c 焗45分鐘

話咁快有得食

 換口味一d都唔難, 試下用有菠蘿碎嘅乳酪

 

可以用罐頭菠蘿加強味道

好似稍為濕咗少少, 早d吸乾菠蘿嘅水份好d, 咁樣有時間重複做

柿子花同sacchettini

見超級市場嘅意大利甜椒好新鮮, 諗住買嚟釀, 跟乜嘢好呢? pasta 又係好似幾新鮮咁, 就買咗現成 sacchettini 同 tortellini 各一盒. 現成嘢始終都係油麻地, 好彩個汁ok.

見到柿子花蕾我就諗起雲吞, 係咪好似呢? 哈哈!

d甜椒好大隻, 好容易釀

一半落芝士, 一半冇落, 因為文唔中意

椒味好濃, 所以我今日即刻用d核嚟種, 睇下得唔得. 通常種子播前要曬乾, 但我曬得幾個鐘, 得唔得都試下啦

星期日麵包

送麵包嘅麵包坊禮拜休息, 所以我哋禮拜日係冇人派新鮮麵包嘅. 

咁尋日有人嚟, 冇出去, 惟有我自己郁手做. 天氣凍(今年真過份, 五月下旬北部重落雪, 我哋呢幾日都係十二三度之間), 發得麻麻地.

以前多數都會用香腸, 但今次文話想食乾腸, 咁我就試下啦. 都ok嘅

蛋散

有一次見到一個卡通仔鬧人做蛋散, 覺得好好笑, 雖然我唔知係咩意思. 

喺我嘅概念中, 蛋散仍然係呢個.

呢次嘅糖膠好似稍為好d, 但祇係偶然, 仍談唔上有經驗到可以機械式地複製.

雖然我依家d工夫仔仍然得半桶水都唔夠, 但起碼可以應付兩個人日常嘅飲食. 諗番當年返嚟之初真係可憐, 買返嚟嘅嘢唔係鹹到死就係甜到黐線, 要啱口味就要自己做.

我一向都冇乜要求, 所以冇學煮嘢食, 點會諗到有一日乜都要自己郁手先有得食? 

都好彩天無絕人之路, 我竟然可以從電視度學到一d基本概念. 對我最有益嘅, 唔使講都係ready steady cook 德版, 縱使唔知佢講乜, 但至今都仍係我最懷念嘅節目.

馬仔

曾經有一段唔短嘅時間都幾灰. 我極力去諗我想食乜, 一來可以分心, 二來唔想家人將來為我有遺憾難過.

我諗起馬仔, 因為先父中意, 我亦中意. 但做馬仔要糖膠, 我祇識做焦糖, 點算呢? 早d, 我可以問我媽媽...

我媽媽煮糖膠好叻, 從嚟冇返砂呢回事. 

我好中意食涼粉, 成日叫媽咪買, 但佢好耐先買一次, 買一舊磚頭咁嗰d. 每次買返嚟佢都要用凍滚水洗過, 再自己煮糖膠俾我哋食. 佢嘅糖膠係落薑嚟煮, 所以別有香味.

我為做呢個馬仔煮咗幾次糖膠, 唔係好得, 試過煮成焦糖.

  手指痛, 搓粉要麵包機代勞

呢d都係叫意粉機做嘅. 下次做嘅話, 要改用幼條先啱

因為粉糰用雞蛋做成, 一經油炸就發大, 影響效果

 加咗番石榴膏同提子乾, 味道豐富咗, 但亦稍為過甜

 感覺太粗糙

果仁酥

感冒開始好, 覺得肚餓, 做咗d果仁酥做零食. 酥脆, 口感唔錯.

新方, 改良自我自己嘅萬聖餅同合桃酥.
糖 200g
粉 500g
蛋 75g
水 70g
豬油 105g
鹽 一茶匙
五香粉 一茶匙
梳打粉 一茶匙
乾果仁 130g

170度c 焗15分鐘

牛油果蝦沙律

有幾個沙律我都中意, 燒西椒馬介休沙律啦, 煙肉鮮蠶豆沙律啦, 重有就係呢個牛油果蝦沙律. 因為文唔中意蝦, 得我一個人食, 平時我都唔會的起心肝去整. 呢個沙律最緊要係有wasabi. 有時間做嘅話, 最好先焯熟咗蝦之後, 落少少蒜蓉同芝麻油撈一撈佢先, 混合其他材料嗰陣先落橄欖油wasabi豉油做嘅汁, 咁d蝦好食d.

 

炭燒薄餅

有人俾咗好多菜俾我, 嘻, 我最中意人俾菜我架嘞.

有菜, 有麵包, 燒豬扒, 就係本地最簡單最平常嘅家常飯. 為咗冇咁悶, 我特登叫麵包機幫手搓咗舊粉, 燒豬扒嗰陣順便燒埋薄餅, 哈, 第一次, 意外地咁好食.

點解剩番兩塊? 咪就係食飽先記得影相囉. 咁薄餅又做乜唔係圓嘅呢? 嘻, 用炭燒, 驚火候掌握得唔好, 所以要盡量薄. 但用rolling pin又驚反彈喎, 咁咪自己用手嚟攤囉, 所以全部都唔同形狀嘅. :)

薄餅剩兩塊, 豬扒都剩兩塊, 貓又唔肯食(佢連魚都祇係中意蒸, 好麻煩), 掉咗佢又浪費, 所以我留番第二日做午餐,  我中午一個人食, 好易搞. 嗱, 切粒粒, 開一罐粟米一齊炒, 做兩個pita袋裝住佢咪食得囉.

用焗爐做pita bread好易, 舊粉夠做四個, 一次搞掂

呢個就係我嘅午餐喇

本嚟尋日上嚟, 寫寫下覺得唔舒服就走咗去瞓覺, 依家先上嚟寫埋佢. :)


 

唔係工廠雞嚟架

尋日有人嚟, 俾咗一隻雞一隻鴨俾我, 急急又要走, 話屋企嗰d重未入雪櫃. 佢哋自己養, 一劏就劏一批, 入雪櫃, 每次都做成日嘅. 上次文去佢哋屋企, 咁啱佢哋前一日劏咗鴨, 即刻喺雪櫃攞一隻出嚟叫文帶返嚟俾我.

我尋日將隻雞嘅髀翼用李派林喼汁, 黑椒, 白蘭地, 同埋橄欖油醃好今日食, 雞身雪住, 過兩日得閒先煲湯.

自己養嘅雞d肉係紅色嘅, 骨好硬, 皮下冇乜脂肪, 煲湯好正.

 

電子瓦罉整蛋糕?

試過, 答案係得嘅.

唔好用舊式底部發熱嗰隻, 用中間發熱嗰隻好好多.

要點係喺墊上幾層厨房紙然後先冚罉蓋, 大約三四層就ok.

笑口棗

今日有小朋友做正式領洗, 聖堂儀式嗰part我冇參加, 但之後佢哋有party, 我做咗d笑口棗俾佢哋.

因為好少做, 所以我梗係要留番一d俾自己食啦. :D 為咗身體健康其實我都少咗食油炸食物, 不過成日都要閘住閘住, 好容易有抑鬱架嘛, :D 耐唔耐都要放縱下至得嘅, 嗱, 用張厨紙吸咗d油咪當健康咗囉, 嘻嘻.

奶皇酥, 咖哩角

復活節有人約咗嚟我哋屋企, 想做d中國式小食嚟招呼佢哋, 但我唔熟, 所以今日做一d試下先, 算好彩, 幾順利.

酥皮都係我自己做

煮埋奶皇餡

做麵筋洗出嚟嘅澄粉可以用嚟做自己中意嘅點心, 最簡單係用滚水撞到佢半熟, 半稀狀態, 將搓好嘅豆沙球放入去coat一層漿, 然後大火蒸兩分鐘就食得, 係咪好方便呢!

牛油果蝦沙律

呢兩日都唔知黐咗邊條線, 好熱呀!

等我做個合時好介紹啦, 牛油果蝦沙律, 要用橄欖油, wasabi 加 Dijon 做汁喎, 好清爽架. 好耐冇做, 可惜今次個牛油果唔靚, 好生.

自製柚子蜜

返香港嗰陣佢哋流行飲柚子蜜, 韓國嘢. 真係好奇怪, 我哋香港人連飲食都有流行嘅, 哈哈! 唔通人哋中意你就一定都中意?

言歸正傳. 我今年終於有西柚, 五個. 於是我又做柚子蜜. :)

做呢五個西柚用咗大半日時間, 好辛苦, 我就話, 下年再有都唔做. 點知做好一試, 嗰種天然嘅清香, 令我即刻改口, 出年有收成嘅話, 幾辛苦都要再做! :D



洗乾淨之後先刨皮. 發覺用呢個刨會噴好多汁出嚟, 後尾改用磁刀效果反而好得多, 皮可以起得薄d, 又唔會整親眼.

最花功夫就係剝皮, 佢層衣唔似椂柚咁厚, 太薄好難剝, 又要輕手, 怕整破佢出水.

加糖煮到可以承得起個木匙就差不多架喇(濃縮到原先唔夠一半咁上下).

熄火等佢降溫之後再加入蜜糖, 混勻就可以入樽儲存慢慢食啦

雖然我已經盡量用薄皮, 衣亦剝得好乾淨, 但仍然係有少少辛辣味同苦味, 相信儲存兩三個月之後會好好多.


我覺得d西柚好輕, 以比例嚟講, 遠唔夠橙墜手. 我嘅品種係ruby star

最大先一磅度