有冇留意到 '最新意見' 走番出嚟呢? 哈! 其實佢同以前嗰個唔同架.
話說, 我真係覺得個 '最新意見' 嘅功能好有用, 因為假如評論嘅係舊帖, 通常都會疏忽咗. 呢一樣yayahoo嘅設計係比較好嘅. 有咗 '最新意見' 就可以減少漏網. 所以我想問可唔可以修理下佢.
都知blogger冇責任, 官方都話係會壞, 叫删除咗佢. 點知竟然有一個人答我, 重不厭其煩教我點樣可以利用blogger嘅官方gadget設定成 '最新意見' . 真係得咗. 不過祇有1, 2, 3, 4, 5, 最多出五條, 冇更高嘅選項. 有冇辦法改變個系數呢? 邊位識嘅請指教下.
前日去買嘢又係碰上一個好人. 我出嚟一轉灣就見到商場門口企住幾個人, 心諗可能真係落雨, 我帶埋把遮唔算多餘. 跟住邊行邊諗要唔要打電話話俾文叫我等我. 咁啱有人入嚟, 聽到出面好嘈, 真係唔止落雨, 重落雹添呀!
正想攞個電話, 諗唔到有一個高大嘅人行過嚟幫我開門, 佢應該係啱啱講完電話. 如果我話我唔係想出去, 咁佢可能覺得尷尬. 所以我惟有出啦, 諗住喺內外門之間都可以打電話, 最多嘈d. 望下個人講多謝, 咦, 原嚟好有型喎, 哈哈!
更估唔到係呢個型男好人到咁, 佢可能見我奀佻鬼命咁, 都係唔夠力開咁大嘅玻璃門嘞(其實嗰度係有一個掣, 撳咗個門會自己開嘅), 竟然再行多一層, 幫我開埋個外門. 我焗住出去. 文話啱啱拎起個電話想叫我落去地下停車場, 話我做乜咁壞天氣都出嚟. 我話俾一個好人趕咗出嚟囉.
呢個世界都係好人多d嘅.
沒有留言:
發佈留言