tweety 杯

飲花雕唔熱唔好飲, 我中意好熱. 不過浸到幾熱都好, 飲得兩飲好快凍晒, 因為打邊爐多數都係冬天. 所以飲緊嗰杯花雕都係要用杯熱水保溫.

呢隻翠兒杯幾好用, 佢有雙層, 冇咁快凍. 我會用一隻瘦瘦嘅杯裝酒, 咁d熱就傳得好快, 好有效.

講起呢隻杯, 其實係兩隻. 大約係95年嘅事. 有一次好似係因為轉火車, 走咗去沙田新城市廣場, 見到擺檔有隻翠兒杯, 卡通公仔我淨係中意佢, 見幾盞鬼, 咪諗住買囉. 點知唔係賣嘅, 係唔記得乜鬼飲品嘅贈品嚟. 飲品喎, 重死dup dup, 點買喎! 問下得唔得買佢個贈品? 梗唔得啦. 半打飲品送一隻杯, 要抽住一打飲品先攞到兩隻, 死啦! 咪算囉. 點知個推銷員幾好人呀, 佢話送多一隻俾我, 即是我拎半打就得. 人哋一番誠意, 咪買囉. 咁就為兩隻杯做咗一餐咕喱嘞.

不過都抵架, 因為中意咗咁多年都依然中意, 而且真係用得着吖嘛.