參加喪禮彌撒雜記

天上雷公, 地上舅公, 可見舅公嘅地位幾重要.
西人未必係咁嘅概念, 但呢位德高望重嘅老人家曾經係我嘅主婚人, 所以以西人嘅觀念依然係重要人物. 而喺我心目中, 佢嘅重要係因為佢係一個大好人, 一個作風硬朗, 乾脆利落, 公道和靄, 善於排難解紛嘅大好人.

前日一整日都落大雨, 好彩尋日成個上午都冇雨.

尋日下午我同文一早到咗教堂外, 當時親友仍然唔太多.

之後靈車運來遺體. 漂亮嘅二表姐(uncle三個仔女, 大表姐同三表弟同文比較親密, 但二表姐最靚, 又最似uncle, 而且同uncle同生日)前晚先趕返嚟, 一見文就忍唔住喊. 文自細同呢家人關係好密切.
我唔係教徒, 一向參加喪禮都祇係去後半部分. 不過尋日好朋友b小姐拉埋我入教堂, 係我第一次去喪禮彌撒.

b小姐拖住我喺入門口對住嘅位置坐低, 因為對住門口, 寒風一陣一陣咁吹入嚟, 喺暖暖嘅教堂裡面依然感到陣陣寒意.

因為靈車已經到咗, 教堂嘅鐘聲就不停咁響住.

冇幾耐, 棺木安置好, 親朋鄰里亦陸續進入教堂, 令呢間有座位嘅地方大約祇有兩千呎左右嘅鄉村小教堂擁擠不堪, 後面嘅閣樓同通道都企滿人, 空氣亦變得污濁, 我喺心度不禁讚b小姐一句, 如果唔係佢揀對住門口嘅位置, 真係氣都透唔到.

一陣密集嘅鐘聲之後, 神父就位, 儀式正式開始. 整個過程大約一個鐘多d, 中間曾經有兩位年長女士領唱詩歌, 前一位聲色俱佳, 但我唔識佢哋.

做完彌撒出嚟, 原嚟重有好多人企喺教堂外面.

跟住去墳場, 祇有幾分鐘車程, 喺嗰度我先見到aunty. 佢冇哭哭啼啼, 好安祥得體.

因為好多人係好耐冇見面, 所以文俾好多人圍住, 我同文交代一聲就走咗出嚟, 自己一個行去坟場盡頭嘅地方睇下老爺. 呢幾年, 呢個坟場我已經嚟咗好多次.

走嘅時候, 文周圍搵uncle嘅一個鄰居, 佢搭的士嚟, 返去應該冇車, 我哋唔見佢, 我話佢可能行先, 我哋要快d. 果然佢已經出咗去. 好彩佢隻脚唔方便, 我哋一出嚟就見到佢. 喺車度, 佢話uncle死咗, aunty都唔會好耐. 唉.