絮言亂語

唉, 估唔到個hi5帶俾我咁多麻煩, 陸續有email話俾我聽唔識用, 我就要逐個解釋.

今日好唔得閒, 不過幾開心.

二月尾嘅時候嫁接咗兩棵橙樹, 一棵得, 一棵唔得. 不過早兩日先發覺, 我採嘅接穗採錯咗, 即是嘥氣. 不過試驗都證明咗一樣嘢, 就係劈接係可以用喺橙樹嘅.

今朝去咗做芽接法, 第一次做, 唔知結果點. 依家為時幾晚, 但我都係去試.






跟住去鋸咗一林貼梗海棠, 因為生得太大林, 遮咗好多陽光. 下午諗住繼續做埋佢, 但隔離個太太散步入咗我果園穿上嚟(佢依家對我嘅果園好有興趣, 耐唔耐就帶埋法蘭西斯嘉小姐一齊過嚟睇), 見我喺側門, 啱啱傾咗兩句, 對面太太隔住馬路問我要唔要生菜, 我話我都有. 到我問佢要唔要杏子, 佢話要, 然後過嚟摘, 跟住佢住隔離嘅家姐又嚟埋, 我哋四個女人就喺花園度開party咁, 好開心.

一次過, 就攞走咗四個超級市場購物袋嘅杏子, 好啦, 今年啱啱熟就可以銷咗咁多, 唔使熟到跌晒咁嘥.

不過聽日我重要繼續去派俾人.

我今日重發現咗一樣嘢, 原嚟棵杏樹都有一個鳥巢呀! 我話俾文聽, 佢話係咪呢, 妳重話有人棵桔樹唔會有鳥巢, 依家棵杏樹咁近馬路嗰邊都有呀! 咁又俾佢駁啞咗我.



文又問個鳥巢周圍辣唔辣撻, 我話好辣撻, 佢話咁d雀仔應該走晒. 咁我就攞把梯去睇, 真係乜都冇. 原嚟, 辣撻嘅意思就係雀媽媽成功養育小朋友, 而依家已經六月, 小朋友識飛, 佢哋就唔會再住喺度.

今日鋸樹鋸到我好攰呀, 要早d瞓喇.
晚安.