因為要遷就攞證件返大陸拜山嘅時間, 我哋揀咗四天團去台灣, 選擇好有限.
呢個團質素唔錯, 多數都係半唐番, 美國加拿大嘅華人多. 所以相當愉快, 大家都行動迅速, 唔使左等右等.
最後一日係全日自由活動. 我同我家姐由九點鐘離開酒店到六點鐘返酒店集合唔夠十個鐘之內, 去咗好多地方, 冇搭過的士, 諗起都好好笑.
出酒店之後我哋搭火車去淡水, 喺淡水遊蘯下, 食下嘢咁. 最後行到去碼頭, 好似都盡頭, 就返轉頭. 出番嚟大馬路, 見到一場幾有睇頭嘅喪禮, 我哋企喺路邊睇到結束先搭返火車返台北市.
我哋火車出國父紀念館, 太多嘢睇, 但冇時間, 求其睇下又要走. 我哋諗住去鼎泰豐食小籠包, 接待處個女仔教我哋行, 解釋得好詳細, 我哋好順利咁搵到, 重好好彩14點到, 趕得切落柯打, 14:30就冇小籠包.
然後又搭番火車去重慶南(?), 書局街, 我哋想去誠品, 但原嚟我哋出嚟嗰個火車站裡面有誠品, 我哋冇時間行番轉頭, 算數.
跟住我哋又行行, 去西門町食雪花冰, 嗰間三兄妹真係唔錯, 幾好食. 有個人, 可能係老闆, 知我哋係香港人, 識講幾句廣東話就認親認戚話係自己人, 好好笑. 佢有送芋圓同涼粉俾我哋.
導遊講大陸客用一個禮拜遊全台灣, 然後抱怨起得比雞還早, 跑得比馬還快. 我哋嗰日真係不遑多讓, 雖然起得冇雞咁早, 但真係跑得可以同馬比, 哈哈.
呢一團最唔好就係返到香港太夜, 十一點半先落機.
呢度淡水碼頭, 喺d屋中間穿番出去就係大馬路, 轉右去火車站返台北. 我哋喺嗰度睇個喪禮.
國父紀念館後面出去轉左, 行幾個路口就有一間鼎泰豐
重慶南係書店集中地, 就喺呢個地標附近
西門町, 好食刨冰嘅三兄妹, 喺呢條街嘅另一頭
呢兩張係喺車裡面影, 台灣監察院. 啱啱停紅綠燈, 趕得切影.
咁都好, 有一日自由活動, 又無煩人.
回覆刪除4 日遊完全台灣? 咁趕做乜? 辛苦過返工. 亦唔REALISTIC, 乜叫做全台? 東南中北都去一去? 哈.
香港既零團費, 真係烏煙瘴氣. 一邊又孤寒, 係咪呢? 另一邊就要死GUM 爛GUM, 水魚游上門, 賣D 古靈精怪既野去賺快錢.
你話香港人可能以前比氣澳門人受, 家下人地有仇報. 97 後真係無哂FACE. 亦唔識腳踏實地. 不過亦可能無得腳踏實地, 不屬安居樂業地方來既. 充滿呢D 搞作. 迫人買野.
哈, 去搵下什麼秘技去移走個圓圈先 :)
我哋祇係台北, 因為時間少, 唔想又去高雄又去台南咁用晒d時間喺車度, 所以刻意搵祇有一個地方嘅團.
回覆刪除全台係同胞去, 佢哋可能始終唔係咁多機會, 一去就要去晒, 八天團要行晒台灣係高難度, 唔辛苦就假.
其實羊毛出在羊身上, 零團費, 邊有咁着數吖! 一早就唔應該俾d咁唔愉快嘅嘢發生.
香港有班咁嘅官有乜計? 主人唔做做妹仔, 老懵懂一開始就開壞咗個頭.
無謂洗眼啦. :D
上次到台灣,是2000年五月,幾天後,陳水扁便要宣誓就任中華民國總統,是歷史上第一屆非國民黨總統.那時台北市面氣氛平和.
回覆刪除闊別台北多年,前此有十數年,常到高雄參加扶輪姊妹社授證典禮.
久違的西門町歌廳,街頭零食如醬鴨舌頭,滷蛋等,初嘗景泰豐小籠包風味,故友同遊,感覺良好.
轉眼十年!
我嗜甜, 所以對麻糬呀, 雪糕呀嗰d反而興趣大d, 嘻嘻.
回覆刪除