一棵樹除咗淋水施肥, 其實修剪係幾重要嘅管理嚟架. 一年時間, d枝條就會生到亂晒龍, 唔剪, 即是縱容佢亂咁生. 而我累積咗咁多年, 都可想而知亂成點. 今年發狠去剪, 當然要好重手, 有d成2"粗嘅樹枝都要鋸走.
剪咗係靚好多, 起碼冇咁亂. 但係, 老實講, 咁多年唔敢剪, 好大因素係因為對佢哋嘅生長習性冇把握. 有d樹, 例如桃樹, 橄欖樹, 你可以鋸到佢得番主枝, 佢第二年就可以生番出嚟. 但有d樹就唔喜歡人剪佢, 例如合桃樹, 櫻桃樹. 咁西梅同杏子係屬於邊種呢? 剪得咁重手又有冇問題呢? 真係有d驚. 因為分分鐘有可能殺死幾年嘅心血架.
其實我都有就住剪架喇, 有d枝條會擾亂樹形, 但位置唔係太阻住嘅話我都留番佢喺度結果, 過多兩三年先剪走.
依家點呢? 等出年嘅判決囉.
今年有60棵果樹, 呢幾日唔落雨剪咗26棵, 其餘有d唔使剪, 有d要到五月先剪得, 剩番要剪嘅唔係太多, 希望多幾日唔好落雨, 俾我做埋佢就好嘞. 跟住就要剪玫瑰, 大約有二三十棵, 咁今年嘅修剪就完成. 然後要處理喺荷蘭買嘅荷花, 已經培養咗一年, 今年要將佢放埋落去個蓮池度, 必須趕喺佢發新芽之前. 唉, 希望做得嚟啦, 呢個月有四份生日禮物要買, 重未做咋, 最煩就係呢d.
禮拜下午又係照例唔得閒, 乜都做唔到架喇. 有d花已經開, 真係唔夠時間.
西梅, 杏, ..
回覆刪除柿生得好?
我估西梅應該粗生.
希望佢粗生啦.
回覆刪除三棵柿都ok. 最先買嗰棵終於今季見到佢生長. 第二嗰棵每年都好生性. 最新嗰棵果然係冇澀味, 可以生食, 而且係生好食d, 熟咗個口感好粉好糯, 有咗水果嘅感覺.
你哋得唔得種柿子? 不過得都冇用, 你都唔食.