2013年1月10日星期四


 


喺門口企一陣, 隱約聞到一陣花香, 覺得好奇怪, 呢個時候邊度嚟嘅花香呢? 周圍望, 發現喺已經長到好高, 亂晒龍嘅小蒼蘭中間有一朵黃色嘅花, 撥開一睇, 係一朵牡丹! 其他嘅老枝其實重未發芽, 呢朵花可能係因為被小蒼蘭阻擋咗d低溫, 所以咁早就走咗出嚟.

又見到花開, 覺得時間真係過得好快. 返香港嘅情形依然歷歷在目, 但一數已經差不多三年, 我媽媽亦已離開咗兩年半.

以前我媽媽成日都好緊張我哋嘅健康, 起居飲食好多限制. 佢成日話三十之前人欺病, 三十之後病欺人, 唔好等到吃苦先嚟後悔. 我哋總係唔上心. 但近期由於我自己嘅健康問題, 令我深深體會到病欺人係點一回事.

如果你唔覺得自己老, 好似我以前咁, 恭喜你, 你一定好健康. 但好似我依家咁, 總覺得身不由己, 最快嚟到我意識中嘅係, 三十之後病欺人, 我唔再年輕...

各位老友記, 你哋可能比我年輕好多, 又或者同我年齡相若, 無論點, 我衷心希望嘅係, 大家都珍惜健康, 享受生命, 因為光陰真嘅消逝得好快架.







Posted by at
Labels: ,

4 則留言:

  1. sam2013年1月13日 上午12:49

    貓貓返左屋企? 有D狗牌, 貓牌有GPS... 不過你都係唔用架啦.
    K 媽媽新年前, 聖誕後出左院, 無乜特別. K 一路探佢時, 隔日, 同佢弟婦, 分一人一日, K都有D E 口我, 佢唔中意去醫院, 佢話佢老人家有D細路仔, 好似幾享受飯來張口既時光.
    我無去探佢, 因為佢彷彿會緊張要戴假牙. 我從來唔知其實平日見既佢係修飾過, 係上次佢入院至明白.
    係, 要健康. 呢樣野真係一種福份. 有時我想起已經離開既友輩朋友長輩, 果D都係好好既人, 就懷疑真係有大能旨意, 好難明白.
    係, 要健康,要珍惜.

    回覆刪除
  2. 匿名2013年1月13日 下午3:46

    "秋決"時第一次感觸,是時候雁過留聲了.
    事過更珍惜身邊美好一切.
    ----- 白田

    回覆刪除
  3. M Man2013年1月31日 上午7:01

    Re sam:
    其實我唔驚佢蕩失路, 驚嘅係佢有意外, 或者有人帶走佢. 有人帶走佢都好d, 中意先會帶走, 咁一定對佢好.

    老人家在意自己嘅儀容, 有能力修飾自己, 證明佢有自理能力, 我覺得呢方面增加下佢嘅麻煩唔一定係壞事, 唔需要避忌.

    就係囉, 點死都輪唔到d衰人架喎, 要長命可能要做衰人先得囉. :)

    回覆刪除
  4. M Man2013年1月31日 上午7:08

    Re 白田:
    等醫生嘅結果真嘅好似等判刑咁, 係極度不安嘅事.

    '事過' 即是白田先生你冇事啦? 講到秋決好得人驚呀! 保重!

    回覆刪除

訂閱： 發佈留言 (Atom)
window.setTimeout(function() { document.body.className = document.body.className.replace('loading', ''); }, 10);