Lucky 已經喺17號入土為安. 相信係俾車撞死.
我其實好唔開心, 好自責. 呢排除咗好多貓公嚟搵佢,貓公又嘈佢又嘈之外, 佢重成日好似貓公咁喺屋企小便, 有時重一日兩次, 啱啱抹完又要抹, 用漂白水抹都冇用. 先頭我都有鬧佢, 重用個烏蠅拍pet過佢添, 但都阻止唔到佢, 之後都冇咁好氣, 佢死前嗰幾日我唔睬佢.
15號晚佢出咗去, 晚餐我就咁擺喺度就算, 冇去搵佢. 16號朝早起身見佢冇食嘢, 同文講, 文話可能佢匿埋瞓覺, 因為16號落足一日雨冇停過, Lucky好唔中意濕, 從嚟都未見過佢濕身.
到夜晚都重未見佢, 覺得唔妥先去叫佢, 發覺佢唔喺樓上, 咁就冇地方去搵.
17號有人撳鐘, 話你哋隻貓死咗喎咁. 吓! 喺邊呀? 佢話喺你哋外面個花槽呀! 我出去一睇, 真係佢, 濕淋淋.
文請人幫手埋咗佢, 喺花園一棵桃樹下, 佢生前好多時都會喺嗰度.
如果我早d去搵佢返嚟, 就可能唔會發生.
三年前驗到佢個腫瘤係惡性嘅時候我哋都準備咗佢隨時會離開, 如果佢係病死, 我會容易接受得多.
反常行為, 似病發先兆, 躲著安息, 是動物本能, 也可能自我了斷, 非關車禍, 請勿自責.
回覆刪除算起來, Lucky 已得享天年.
Healthy 的反應怎麼樣?
......白田
相信Lucky是因病而去世，不要臨妁終自責，牠已比好多貓幸福，臨終還有那麼多朋友來找牠，願牠在新的世界也有一戶好人家。最近我也因也斯的突然去世困擾非常，總是放不下，唉，識教人唔識教自己。
回覆刪除Sorry, 上文第二句打錯了，應是＂不要自責＂。近來精神很不集中。
回覆刪除涉及車禍好可能搵唔到, 車到貓落車執番好... 呢個機會, 就算係歐洲, 都兩睇, 好靜既住宅區車到, 落到車執, 就去認埋錯, 按鈴, 係咪你地既, 我既錯.....會咁, 應該.
回覆刪除(之所以....) 唔知囉.
傷心完建議你去睇康熙來了, 關於寵物果D, 近期出既.
佢亂屙可能係病情惡化, 佢有區域, 不同區域有不同用途, 專家話. 專家亦話佢好似人咁. 所以以後唔好打HEALTHY, 要講道理.
(打好少.輕拍幾下.)
都唔好囉.
節哀順變, OSWALD 兄都係.
http://youtu.be/FZN3JqWT_eI
回覆刪除http://youtu.be/TEohpGDY6Vo
要用定呢D GPS 東西.
Re 白田:
回覆刪除都唔一定係反常, 大小便冇紀律由細就係lucky嘅問題, 亦都係我唔中意佢嘅原因. 但一個差不多十一年(佢三月就夠11歲)嘅家庭成員一下冇咗, 屋企明顯靜咗, 真係好唔慣.
我覺得healthy最早知佢有事, 因為我哋房間有一隻門可以直接出花園, 而個門口對出去係差不多lucky出事嘅地點, 距離都係十米多咁上下. 平時我都會開嗰隻門俾healthy出花園, 但16號嗰日我見佢有d特別嘅舉動, 開隻門, 佢又唔想出去, 我懷疑lucky出事佢係聽到嘅.
依家healthy黐家咗, 出去玩都會耐唔耐返下嚟. 以前佢會怕lucky打佢.
Re oswald:
回覆刪除你都要放寬心懷.
lucky個黃色男朋友可能已經死咗. 天啱啱開始熱嗰陣有一日我見佢喺我哋門口, 冇為意. 但到黃昏時候出門口見到佢仍然喺同一個位置, 就覺得唔妥, 諗佢係咪肚餓定係病, 即刻去攞d肉嗌佢, 佢跟我去咗後門, 我叫佢食嘢, 佢淨係聞下, 好似想食但又唔食咁, 然後行咗去. 咁我冇再理佢. 之後好耐都冇再見到佢.
過咗兩個月, 又見到佢, 我影佢相好開心俾文睇, 話見番隻貓, 冇事. 文話唔似係佢喎, 呢隻淺色d, 而且係藍色眼. 我話係咩? 原嚟係另外一隻?
之後有一日, 對面太太嘅先生過嚟搵貓, 原嚟隻淺黃貓係佢哋嘅. 佢走咗之後文鬧咗一句畜牲, 我問佢咩事, 佢話隻黃貓可能已經死咗, 原嚟嗰個人話俾文知佢有射擊隻黃貓, 因為嫌佢嘈住佢哋瞓覺. 文同佢講, 我哋都應該射佢哋隻淺黃貓, 佢都成日嘈住我哋瞓覺. 我問咁佢有乜反應? 文話佢扮唔識聽. 唉, 呢d人, 自己隻貓當寶, 但對人哋嘅貓唔係嘢咁.
lucky一直都好惹貓公. 早嗰排日日夜夜都兩三隻嚟. 但嗰d貓全部都怕人, 唔似隻黃貓咁友善.
Re sam:
回覆刪除我同文早幾日先啱啱講起, 我哋算好彩, 咁多隻俾車撞死嘅貓都可以全屍落葬, 包括嗰隻唔知喺邊度嚟嘅黑貓, 喺我哋門口俾車撞死, 我哋都叫做可以埋葬佢.
healthy容易教好多, 佢曳係聽人嗌嘅, 重有一招, 祇要抱起佢, 佢就好乖好服從嘅, 所以佢每次喺外面玩完返嚟都好容易幫佢抹乾淨手仔脚仔, 呢樣同小公主好相似.
====
以前我父母屋企嘅狗好似scan佢耳仔就有佢嘅檔案. 但我哋呢度咁多隻貓都冇做呢d, 冇人叫我哋做, 可能貓冇危險性啩?
以前小公主同lucky都戴頸帶, 自從小公主唔見咗兩個禮拜返番嚟, 發現佢條頸帶跨過隻手, 我哋就意識到一旦頸帶俾嘢鈎住, 對佢哋係好危險, 從此全部剪斷晒, 唔再俾佢哋戴. 所以就算佢哋d門仔我哋都唔要電子嗰d, 因為個感應器要佢戴住, 即是有機會俾嘢鈎住.
嘩唔得喇, d手指硬晒.
ah, 話最新留言嗰個 gadget壞咗, 建議鏟咗佢喎, 呢樣真係唔方便, 睇唔到有咩回應, 尤其如果舊文回應唔知.
11 年係比較短命，我上一次的貓兒有人歲19年,死了快有8年,與我很老友,牠的小動作我還記得.
回覆刪除