去奶奶度, 發覺門口粉紅色嗰棵茶花做乜又有紅色嘅呢? 以為種多一棵, 冇理由種埋一齊架? 奶奶話唔係, 得一棵之嘛, 係兩種色架. 佢見我咁有興趣, 嗱嗱聲就拗咗一大枝俾我, 佢話可以用花樽養, 好襟開. 本嚟唔想要, 但又唔想掃佢興, 就帶咗返嚟.
其實我嗰兩棵茶花都係佢買俾我嘅, 我好唔中意嗰個顏色. 咁我見橫掂都攞咗返嚟, 就剪咗兩節去嫁接, 哈哈! 應該成功嘅機會好微, 一來未試過, 二來似乎太遲. 點都好啦, 唔試又點知唔得呢? 試下冇壞嘅啫.
呢排成日條頸都敏感, 文以為係香水問題, 我話我d香水都係噴落衫度咋, 邊關事呢? 我又諗, 係咪頸巾呢? 好啦, 呢幾日都唔使用咯, 但一樣痕. 我又懷疑係d頭髮長咗, 今日終於將佢剪短兩吋, 睇下又點啦. 所以都唔夠二十個鐘就沖咗三次涼, 我一d都唔中意換衫, 話就話唔凍, 其實十三四度都唔係好暖架咋. 不過尋日已經改咗夏令時間. 真係好, 我中意夏令時間.
沒有留言:
發佈留言