朝頭早起身唔見隻貓, 諗住好天, 佢周圍去玩.
到下午都唔見, 個心就開始唔舒服, 佢成日唔使食嘢嘅咩? 去大聲嗌佢. 通常佢聽見我聲就會返嚟. 但奇怪, 唔見.
依家日長, 食完晚飯天重未黑, 但都冇理由咁多個鐘頭走咗去. 於是一路行過去水源同松林搵佢. 行咗一個圈都唔見. 返到巴士站後面個尤嘉利樹林, 見到有一隻貓, 毛色同佢好似, 行埋去睇真, 唔係, 呢隻深色d.
搵唔到.
夜晚等到兩點都唔見佢返嚟, 惟有擺d蒸魚喺佢隻碟度, 然後上床.
成晚冇聲氣, 望下個鐘, 四點幾.
突然, 聽到佢把聲, 望下, 原嚟係我瞓着咗. 睇下個鐘差不多六點, 天開始光. 起身換洗. 隻碟d魚重係度, 即是真係冇返過嚟.
噴咗d防蟲水, 諗住去搵貓.
由後門出, 重未行到側門, 見到有個白色影喺牆角轉出來, 望真d, 係healthy仔呀! 佢一見我, 即刻加快脚步走嚟我度, 抱起佢睇下有冇受傷先.
冇事, 淨係好餓, 有d驚慌. 唔知呢24小時佢經歷咗d乜. 總之返番嚟就好啦.
唉, 養隻貓真係好麻煩.
又一次失而復得, 先苦後甜!
回覆刪除應有領悟, 看破.
貓這生物, 像人, 天性愛自由, 有時野性不羈, 多情還似總無情.
我仍愛貓, 自愧閒雲野鶴, 不配再寵養.
--- 白田
由頭到尾我都係好被動, 一早已經講咗養完lucky唔再養. 但咁多人家佢唔去, 偏偏搵到我, 我祇好相信係上天嘅安排. 咁既然養咗佢咯, 就當然係全心全意對佢好啦. 況且唔係冷血又點會冇感情? 尤其好似佢咁得意, 嗰種純真個性同我好啱key.
回覆刪除領悟一早有, 小公主嘅時候我就感悟到愛要及時. 嗰陣因為啱啱搬屋, 花園果園都係由零開始, 忙到氣都抖唔到, 雖然都已經盡量同佢玩, 但一個人得一對手, 一日得24小時, 好多時真係由不得我話事, 所以佢死咗之後嗰種遺憾… 唔係遺憾… 諗唔到準確嘅字. 總之嗰種傷痛唔會有人明. 失去嘅嘢係會永遠失去, 返唔到轉頭.
看破對我嚟講就不必喇. 我冇咁嘅慧根, 看唔破, 亦唔稀罕看破. 有血有肉一個人, 點解要無情無義? 重要美其名為看破? 真係出家我就信看破. 查實依家連出家都係假嘅. 呃神騙鬼我祇會反感. 我係 '情願流淚也不願意後悔' 嗰種人,
乜嘢都有代價, 養一隻貓仔都要付出, 而且付出唔會少. 但喺我困擾嘅日子佢陪過我, 我亦唔會唔記得.
能夠看破, 便每事順其自然.
回覆刪除就當Healthy私奔不成好了.
--- 白田
先父口頭禪係 '隨其自然' , 所以早就習慣凡事不強求, 呢d唔需要參.
回覆刪除莫講話Healthy私奔, 係佢意願, 就算係有人想收養佢, 我都冇所謂, 中意佢自然會鍚佢, 最緊要係咁啫.
上次唔見咗佢, 我開始嗰陣都諗, 唔要佢嘅人應該住喺附近, 或者佢細嗰時唔方便照顧, 會唔會依家見佢大個咗又想要番佢? 如果係, 應該同我打個招呼, 我祇係想得個'知'字.
我第三日都繼續搵, 一來驚佢受傷錯過救援機會, 我會成世唔安樂; 二來諗住就算佢死咗, 都要俾我見到屍先叫明白, 咁咪心熄囉.