蒸汽熨斗比較

一次過買咗四樽五公升裝嘅蒸餾水. 買俾大笨象解渴? 嘻嘻, 梗唔係啦, 買俾熨斗飲就真. 冇咗熨斗一個月有多, 未熨嘅衣物床具堆咗幾棟. 終於搞掂.

呢幾年換熨斗真係換到我煩, 全部都係因為俾 limescale 塞住, 呢度d水硬過香港好多架嘛. 冇計, 惟有的起心肝用蒸餾水囉.

呢幾年用過呢幾款熨斗, Ariete 3300 pro(意大利製造), 太舊, 已經搵唔到圖片.
最平, 大約六十幾唔到七十蚊.

Delonghi pro 1420(中國製造), 九十幾蚊.

Breville VIN 170(中國製造), 一百零幾蚊.

最新買嘅係Rowenta - DG 8421(法國製造). 一百八十九蚊.

原先打算買 Bosch TDS2520, 好似一百五十幾蚊. 但一睇, 又係強國出品, 好輕下, 改變主意買咗Rowenta.

最中意係Ariete 3300 pro, 因為蒸氣同溫度可以分開調節. 但相對依家嘅熨斗, 佢壓力比較細, 唔記得每分鐘係70定75g.

熨衫效果最好係Delonghi pro 1420, 有4 bar壓力, 蒸氣量達90g, 熨過嘅衫纖維結完全解開, 件衫係軟身同墜手嘅. 但一年唔夠就塞晒, 諗住費事拎去整(兩年保養, 免費, 但嘥時間), 買咗熨斗除垢劑自己整, 點知即刻生鏽, 原嚟說明書有寫唔可以用, 係我自己疏忽. 於是報銷. 

Breville VIN 170 喺燈仔停止閃動時嘅熨衫效果亦唔錯, 但佢唔夠力, 每用三四秒蒸氣就要等十秒八秒, 重有一樣唔好, 佢係膠熨斗, 好輕, 時時俾條輸氣管拖郁, 擺放要好小心.

Rowenta - DG 8421, 佢熨斗底有400個蒸氣孔, 用咗一個月度, 暫時未覺得滿意, 可能係我重掌握唔到使用技巧, 又或者係太多蒸氣孔, 所以d衫熨出嚟係唔理想. 5 bar壓力, 蒸氣量120g, 諗住好好, 但唔係, 效果一d都唔好, 用多蒸氣件衫硬嘅. 不過佢嘅乾熨係我用過所有熨斗中最好. 


Breville VIN 170 同 Rowenta - DG 8421 可以隨時加水, 幾方便, 但耗水量好犀利, 熨衫半個鐘用水超過一公升(所以Rowenta - DG 8421甚至冇steam lock), 而且佢哋泵水嘅時候都幾嘈.

每個都係有辣有唔辣, 要睇邊樣對你重要d. 如果俾我再揀, 效果計我會要番Delonghi pro 1420. 我始終都係中意不鏽鋼身軟木手柄嗰d款. 最衰佢係大陸造, 用料差d. 不過個Rowenta - DG 8421雖然睇落係膠殼, 但好重身, 同鋼身冇大分別.