相中人啱啱領取到手嘅免費飯盒被途人撞跌, 雖然檔主即時補發一盒俾佢, 但佢仍不捨地將地上食物夾番上飯盒. 而街邊嘅流浪狗見地上有食物, 當然趨前爭搶. 就出現咗呢個人一邊趕狗, 一邊撿拾飯菜嘅相片.
拍照人話當時有人勸佢唔好執, 佢話 '我好想食燒肉, 我真係好想食燒肉'.
呢個故事發生喺香港. 我冇寫錯, 係香港.
另一邊厢, 早前強國有少女因為家人應承買iphone未兌承諾自殺; 而香港亦有婦人因為丈夫拒買iphone威脅跳樓.
我好迷惘, 有人為生存放下尊嚴, 與狗爭食; 有人唔知為乜連生命都放棄. 到底依家個世界嘅價值觀係點嘅呢? 我自問居山野太耐, 實在唔了解, 祇覺得依家發生嘅嘢, 好多都超乎我嘅理解能力, 唔知係個地球轉得太快, 定係我行得太慢.
我唔知我買唔買得起iphone, 但我敢肯定為一個電話連命都唔要, 或者用條命嚟要脅人, 就一定係有病.
唔怕失禮講, 我依家袋住嘅電話, 係一個連相機功能都冇嘅nokia.
其實我覺得手提電話有基本的通話功能便足夠,我近年也是因視力衰退才買一部字體大一點兼有上網功能的電話用來聽網絡電台.
回覆刪除你提到生命,我又想起那些自焚的人,值得嗎?
吓? Kitty, 妳做乜搞到視力衰退咁大件事呀?! 小心d喎.
回覆刪除我對眼都麻麻地, 早排睇醫生話有d發炎, 叫唔好捽眼, 又要滴兩個月眼水, 第一個月一日兩次, 第二個月一日一次, 依家重未滴完.
我依家有老花重麻煩, 雖然話用漸進鏡片, 但始終唔似自己對眼咁好使.
我都中意電話淨係得通話功能, 但佢點都有d咩遊戲之類 '林審' 嘢, 好討厭. 我先頭都有一個有上網功能, 但間電話公司好乞人憎, 成日改d設定, 一唔覺意就連咗上網, 逐秒同你計數, 貴到死, 我覺得又無謂又反感, 去搵一個冇得上網嘅電話嚟用, 橫掂我其實好少用, 我成日都想冇電腦冇電話, 耳根清靜. 我好似越嚟越孤僻呀, 嘻嘻.
今朝尊視麻煩起..
回覆刪除他日吾眸命運同..
幸好現代醫術高明!
那天我捧著諾基亞, 被朋友遠遠看到, 以為發現更小視屏的iphone, 趨近才吐出一聲驚嘆.
公司團年飯抽獎中了sansung, 頭也不回地轉贈同事, 怕沒有特異功能, 走路時沉迷低頭會讓車撞倒.
--- 白田
唔一定命運同架白田先生. 依家有d人三十幾就老花, 但有d人呢, 好似我有個舅父咁, 老咗反而連後生時嘅近視都冇埋, 遠近都睇得咁清楚. 睇下好唔好彩啦.
回覆刪除原嚟先生都用諾基亞. :) 我冇乜嘢會上癮沉迷, 唔係驚呢樣. 我唔好呢d嘢, 唔中意無時無刻都要應酬人, 所以咩牌子, 好唔好, 我全部都冇研究之至, 我祇係揀最少功能最簡單嘅嚟買. 又平, 三十蚊有找.
我其實好少用, 平時屋企人搵我都係打屋企電話. 我平時袋個電話都係防意外架咋. 最有用係唔知文泊部車喺邊, 可以叫佢搵我. :)
文太：視力衰退不是甚麼大事。本身已有近視加散光，年紀大了，再加上老花，看事物自然差一點，特別是一些產品標籤上的說明，無論戴不戴眼鏡都看不到。如果在家，通常會用放大鏡來看，在外就不行了。
回覆刪除每個人的生活方式不一樣，我家中的電話基本上是給家中老人用的，是最傳統的那種，沒有來電顯示，也不是手提式可以拿著四處走的，因家中老人不會用。自從有了手提電話後，我和朋友的聯絡都是用手題電話或電郵，不過以前我的手提電話很少開，主要是用它的留言信箱，因為我做事看書的時候不喜歡被人搔擾。我以前也不喜歡用上網功能的電話，總覺得要上網在家打開電腦便可以。自從香港的主流媒體愈來愈差之後，很多資訊都要靠上網才可以得到最新的，但即使在家都無法隨時隨地打開電腦，所以上年轉電話時才考慮轉用有上網功能的入門式手提電話。當然可以用上網的手提電話，也是因為上網費用不算太貴，我是用月費72元無限上網的plan。
回覆刪除無論手機的遊戲或是電腦的遊戲我從來都不玩的。
Kitty妳真係樂觀.
回覆刪除聽妳咁講, 其實妳重辛苦過我. 我以前戴住近視鏡遠近都睇到, 依家有老花, 近視鏡可以睇遠, 睇近就要除低個近視鏡先睇得清. 依家配咗漸進鏡, 就唔需要剝嚟剝去.
妳要用放大鏡先睇得清, 視力幾弱下喎, 不如問下醫生有冇辦法幫下手啦. 我有個朋友十幾年前做咗個激光手術, 佢原先要用近視鏡, 做咗就唔使用, 佢曾經向我大力推薦, 話好方便. 不過好似係舊年, 我又睇到報紙講台灣第一個引入呢個手術嘅醫生因為佢嘅病人手術後多年先出現頭痛眼矇後遺症, 佢宣佈唔再做呢個手術. 所以如果需要做手術嘅話, 要問清楚風險先好做決定.
我覺得有線嘅嘢比無線嘅嘢係可靠好多, 穩定好多架, 唔止電話, 就算鍵盤呀, 滑鼠呀咁都係架啦.
回覆刪除香港72蚊就可以無限上網, 我哋真係得個 '恨' 字囉.