有d砧木會巨化

假如完全冇優化作用, 咁就失去嫁接嘅意義. 所以嫁接對選砧通常都係有明確目的, 例如果樹, 想方便管理, 當然係矮化好, 重要睇下想早熟定遲熟, 諸如此類; 用嚟做防風林, 點都想佢高大d啦; 其他, 防病害, 耐旱, 都係考慮因素, 總之抗逆能力要好.

不過好多時要因應佢同接穗嘅親和力, 效果唔係最理想都冇辦法.所以好多時買番嚟嘅樹苗, 種下種下, 佢嘅優劣慢慢就會顯露出嚟. 早前見到用枳嫁接嘅橙有矮化咗. 但呢棵西梅明顯係巨化. 我自己用桃樹嫁接過, 亦都係巨化, 所以我相信佢有可能都係用桃做砧. 桃砧嘅好處係耐旱, 但短命.