yayahoo 執笠

一向對yayahoo嘅服務都冇好感, 最初源於佢對轉郵嗰d咁嘅濕星服務收費, 感覺呢間啱啱先叫有d名氣嘅公司太小家, 太冇遠見, 開始睇小佢. 

跟住係無啦啦鎖咗我嘅郵箱幾個月, 追咗佢又幾個月, 終於開番, 俾我嘅解釋係, 我超過四個月冇使用佢. 開番嘅郵箱係空嘅, 我嘅所有嘢唔見晒. 

用開嘅郵箱點可能四個月冇用? 嗰時好似gmail重未出世. 最多重係要用邀請信申請嗰個階段. 我除咗isp嘅郵箱, 就祇有一個yayahoo. 從此反感, 盡量唔會用佢嘅服務, 尤其重要嘅嘢.

但用開嘅嘢因為懶改, 費事掀一髮動全身, 所以繼續保留. 到2011年10月又出事, 俾人入侵亂發郵件.

舊年, 香港嘅表哥通知, 佢嘅yayahoo郵箱中毒, 叫唔好開由佢郵箱寄出嘅郵件.

今年四月初, 大陸嘅表妹通知我改email地址, 原因係佢用開嘅雅虎中國郵箱停止服務...

 yayahoo 嘅劣跡, 唉, 罄竹難書. 

不過仍然有好多人用佢, 我家姐係其一. :) 依家yayahoo 連blog都執, 我叫佢好快d搵定後備, 咪唔知幾時雅虎香港又話停止郵箱服務嗰陣就措手不及.

講番y blog執笠. 諗住去同舊日嘅blog友講聲byebye, 叫做有頭有尾. 點知一睇, '關註blog友' 全部冇晒, 冇幾耐之前重喺度架!

冇bookmark佢哋, yayahoo升呢之後d名又改晒, 唔知邊個打邊個. 喺咪激鬼氣?

搵番部分, 但好多都早已人去樓空, 感覺幾唏噓.