上星期第一次見物理治療師(一個淺金啡頭髮嘅後生靚女). 聽見佢話我唔正常, 嚇得即刻問又係咩唔正常. 好彩, 佢話同我玩, 其實係我身體嘅flexibility比常人好好多, 問我係咪跳舞嘅, 重話留意到我企同坐嘅姿勢都非常正確. 咁都好d.

唉, 我依家一有乜嘢風吹草動就膽戰心驚. 


喺物理治療中心, 所見多數都係上咗年紀嘅人, 中風嘅佔多.

不過亦見到有年輕人, 交通意外同工傷受傷後期康復治療, 亦有語言治療.

有一位年輕女士, 大約三十歲左右, 令我覺得有d傷感. 佢得嘅係MS. 

文有一個好朋友亦有同呢位女士相近嘅病, 遺傳自佢媽媽, 感覺同功能退減由脚開始逐漸向上移, 最後喺十多年前離開咗. 

記得我第一次見呢位朋友係佢同另外嘅朋友一齊嚟我哋屋企, 當時佢需要拄住手杖嚟行. 之後唔係好耐, 我哋去佢屋企, 佢已經要坐喺輪椅上同我哋食飯. 再之後, 不斷聽佢太太講佢嘅健康變化(我哋已經成為好朋友, 時常通電話或者見面), 直至佢完全失去活動能力. 由頭到尾十三四年, 一切都祇向壞嘅方向發展, 從未有絲毫好轉過.

希望十幾年呢方面嘅醫學發展好好多, 但願呢位女士好運.