其實嗰兩棵係香椿

除咗生長期長嘅, 例如番茄, 荳, 其他生長期短嘅蔬菜我咁多年都冇辦法學好點種. 所以對香椿呢種祇係喺書度讀到嘅 樹蔬菜 一直都心思思想見識下. 

香椿好多時都喺書度見到, 似乎好有名, 種一次就年年都有得食, 重話有獨特嘅香味, 雖然連見都未見過, 但就真係好吸引我. 連高陽喺秣陵春都寫李煦用想吃香椿做藉口扒灰啦, 哈哈.

據說香椿有分紅葉同綠葉, 以紅葉香氣濃而味道佳.

紅葉係中國特產, 所以我就搵紅葉嘅種子買.

出咗兩棵, 生長非常緩慢. 但似乎兩棵係唔同顏色嘅, 唔通咁好彩紅葉綠葉都有? 如果順順利利種大嘅話, 咁我就可以親身比較係咪紅比綠優喇.

左邊綠葉, 葉形偏寬; 右邊紅葉, 葉形窄長

紅葉

綠葉