花粉又嚟喇

嗰日同文兩個落果園, 真係稀罕, 佢極少落去. 我重喺度介紹我d嫁接傑作, 突然'啪'一聲, 嚇咗我一跳, 驚惶失惜循聲望去, 見到一舊舊黃色粉團, 我以為有人開槍定係咩爆炸. 跟住聽見文話'嘩咁多花粉', 原嚟係一個大松果跌落嚟, 撞到d樹枝, 就震起嗰d花粉. 可惜手頭冇相機, 真係幾壯觀架. 其實文以前都有話過喺樹下俾個松果dup落嚟個頭度唔係小事, 叫我去松林小心. 我都係把口應咗, 冇乜上心. 今次見過, 哈哈, 會醒定d, 以後.

呢個季節好煩, 成屋裡裡外外周圍都係花粉, 睇下棵松樹開幾多花就知, 咁多松樹一齊開, 睇個地都係黃色嘅.