人有災難發生, 都話黃金七十二小時. 假如貓需要救援, 佢咁細隻, 咪要更加緊急囉? 計下由星期六晚到星期一晚已經足兩日, 我又無奈又不甘, 係生係死我都想有個知字吖! 星期二天未光透就起身, 決定去遠d.
當時滿山野草長得高過人, 有d連草叢下面係咪實地都唔知, 所以換上及膝嘅長雨靴, 手持一支可以當手杖用嘅木棍, 開始去嗰d我從未去過嘅地方, 邊搵邊嗌.
三四個鐘頭過咗, 一無所獲, 一dd痕跡都發現唔到. 好失望.
返到屋企, 無法可想, 可以問嘅人都問勻, 冇任何線索. 惟有繼續每日嘅工作, 拎個水桶仔, 諗住去水源挽一桶水淋下嗰棵新種嘅松樹仔.
行返屋企嘅時候, 係絕望定不甘, 我講唔清, 祇是企喺個山坡上作垂死掙扎式嘅呼叫.
突然, 我好似聽到貓聲呀! 係真嘅定幻覺呢? 再叫, 佢再回應, 雖然又微弱又沙啞, 但我認出係Healthy嚟嘅! 我哋行山嘅時候就係用咁嘅方式溝通架!
嗰一刻我緊張到個心差d喺喉嚨度走咗出嚟, 因為我重未分辨到聲音來自邊個方向, 好驚就咁就消失咗. 於是我又嗌咗佢幾次, 每一次叫完都好出力咁聽佢回應. 終於俾我見到佢喺一個小山丘下面.
我一下dum低個桶仔, 跑落山坡抱起佢, 佢叫咗一聲, 我知佢痛. 佢當時條尾好污糟, 成身尿味, 我估佢可能肚瀉之類令佢太虛弱而已. 我即刻抱佢返屋企.
返到屋企, 因為咁多日冇食嘢, 怕佢d腸薄, 唔敢俾嘢佢食, 祇係叮暖d奶俾佢飲. 佢可能又渴又餓, 飲得好快. 跟住, 我發覺好唔妥, 佢對脚係完全冇力嘅!
叫文即刻搵醫生. 但最近嘅醫生要兩點半先可以睇佢, 即是要等四個鐘. 冇辦法. 等.
沒有留言:
發佈留言