交到醫生手, 首先想知佢係咪脊骨受傷. 好彩, 醫生話佢脚趾有感覺, 應該唔關脊骨事.
接住落嚟就係各種檢驗 --- 留醫係一定架啦.
夜晚八點, 醫生打電話嚟, 話同佢剃毛抽血嘅時候發現佢隻脚有瘀傷, 問我哋可唔可以幫佢照x光. 當然可以啦, 祇要對隻貓好, 乜嘢都可以做.
第二朝十點幾, 醫生話有結果, 佢左邊盆骨個骹脫咗出嚟. 佢哋曾經喺麻醉咗佢照x光嘅時候試過用手將個骹復原, 但走番出嚟, 因為個骹窩碎咗.
嗰間診所我諗係麥當奴式嘅連鎖店, 開咗唔係好耐, 佢哋呢間冇專科醫生, 要向其他店求助.
第三日, 醫生話想辦法聯絡過骨科醫生, 但要排到星期一先有位幫佢做手術. 醫生話隻貓受傷咁重又住喺醫院咁孤獨對佢唔好, 建議我哋先帶佢返屋企, 到時先再送返佢嚟.
依家先星期四, 咁咪有排等? 文即刻搵其他醫院, 搵到一間雖然遠, 但即晚六點可以見佢. 文即刻打電話同個醫生講, 醫生話會立即將Healthy 嘅所有檢查做成光碟俾我哋去轉院.
去接 Healthy , 醫生將所有嘢都準備好, 重囑我哋叫接手嘅醫生打電話俾佢, 佢會親自同對方交代.
一番交接之後, 醫生設計咗兩套方案, 要打開之後先知用邊套, 佢話七點鐘開始做手術, 叫我哋返屋企等消息.
十點, 文打電話問, 姑娘話手術重未完, 我哋開始躭心.過咗十一點半, 醫生終於打電話嚟, 話啱啱洗完手, 手術好成功, 不過實在比佢預計更複雜, 因為要重組個窩, 肌肉神經全部都要郩過. 但佢預料如無意外, 可以有95% 至100%嘅康復, 星期一應該可以嚟接佢返屋企.
之後除咗拆線之外, Healthy一直都係由原先個女醫生跟進, 除咗因為近之外, 最大原因係因為個醫生同姑娘好中意佢, 每次見佢都係對一個人仔咁, 好細心, 連隻貓俾嘢咬咗一粒'難'都要問我哋.
沒有留言:
發佈留言