壓力煲

 手柄跌斷咗, 唔關個煲事, 係我嘅錯. 個煲質量唔錯嘅, 始終德國製造係可靠. 不過有兩個瑕疵, 第一, 加熱之後, 例如烹煮之後, 就算完全減壓, 個煲蓋仍然好難開(相信係因為煲身同煲蓋嘅金屬成份唔同). 第二, 唔好買perfect plus, 起碼要買perfect pro 或者perfect ultra, 因為呢個perfect plus雖然話有兩段壓力, 但佢係冇機關控制嘅, 祇可以靠熱源調節(實在幾不可理解).

以前好怕壓力煲, 但用落之後其實又唔係咁可怕. 而且有好多烹煮嘅效果, 唔係普通煮法可以達到嘅. 講下我嘅心得.

首先係意粉. 我一向都唔多中意意粉嘅口感, 一係硬身, 夠焾又唔好食, 除非用大量嘅油嚟煮, 咁係可以補救嘅, 但多油始終有d討人厭. 

我發覺最理想嘅texture, 係用壓力煲煮. 誇張? 一d都唔誇張, 你試下就知冇點你. 方法好簡單, 適量滚水, 加一匙鹽, 落意粉, 大火加熱至夠壓, 煮四五分鐘就可以. 咁樣煮嘅意粉焾而唔爛, 凍咗仍然柔軟, 值得一試.

其他值得推薦用壓力煲煮嘅食物重有薯仔同豆類, 唔止慳時間, 更重要係焾而唔爛呢個特點係好好用. 但如果想煮豆沙就用電子瓦罉(?), 我嘅意思係slow cooker, 比較好.